Sý tasqyny qaýpi joǵary aimaqtar ataldy, dep habarlaidy Dalanews.kz.
Ekologiia jáne tabiǵi resýrstar ministri Erlan Nysanbaev Úkimet otyrysynda kóktemgi kezeńge arnalǵan aýa raiy boljamynyń jańartylǵan derekterin usyndy.
Ol naýryz, sáýir ailary ádettegiden jyly bolady dep kútilip otyrǵanyn ári elimizdiń basym bóliginde jaýyn-shashyn kóp túsetinin atap ótti. Bul kóktemniń tez kelýine jáne sý tasqyny qaýpiniń artýyna yqpal etedi.
Sý tasqyny qaýpi joǵary óńirlerdiń qatarynda: Aqtóbe, Qostanai, Qaraǵandy, Aqmola, Soltústik Qazaqstan, Shyǵys Qazaqstan oblystary jáne Ulytaý jáne Abai oblystary bar.
Qaýiptiligi ortasha óńirler: Almaty, Jetisý, Jambyl, Batys Qazaqstan jáne Atyraý oblystary.
Tasqyn qaýpi tómen óńirler: Pavlodar, Mańǵystaý, Túrkistan jáne Qyzylorda oblystary.
«Biyl Qazgidromet alǵash ret ár oblys boiynsha egjei-tegjeili anyqtamalar daiyndady. Bul anyqtamalarda gidrologiialyq beketter boiynsha sý deńgeiiniń jáne aǵysynyń kútiletin eń joǵary mánderi, aǵyn kólemi jáne sondai-aq qaýip aimaǵynda ornalasqan eldi mekenderdi kórsete otyryp, boljamdy bastalý kúnderi kórsetiledi. Sondai-aq ótken aptadan bastap Qazgidromet apta saiynǵy gidrologiialyq boljamdardy shyǵara bastady. Gidrometeorologiialyq jaǵdai kúrt ózgeretin bolsa «Qazgidromet» eskertýlerdi 2-3 táýlik buryn habarlaidy», — dep atap ótti Erlan Nysanbaev.
Bektenov ne dedi?
Úkimet otyrysynda Premer-ministr Oljas Bektenov ekologiia jáne tabiǵi resýrstar ministri Erlan Nysanbaevtyń aldaǵy sý tasqyny kezeńi qarsańynda aýa raiynyń boljamy týraly baiandamasyn tyńdady.
«Sý tasqyny kezeńiniń bastalýyna da kóp ýaqyt qalǵan joq. Ákimder bul máseleni erekshe baqylaýǵa alýy qajet. Tótenshe jaǵdai týraly halyqty habardar etetin barlyq júieniń turaqty jumysyn qamtamasyz etińizder. Áleýmettik jeliler men buqaralyq aqparat quraldarynda aqparattyq-túsindirý jumystaryn kúsheitý kerek. Tótenshe jaǵdailar ministrligi sý tasqynyna tolyǵymen daiyn bolýǵa tiis. Sondai-aq ortalyq jáne jergilikti memlekettik organdardyń jumysyn úilestirýdi qamtamasyz etsin», — dep atap ótti Bektenov.
Oljas Bektenov jaqyn arada atalǵan másele boiynsha respýblikalyq jedel shtabtyń otyrysyn daiyndaýdy tapsyrdy.
