Elimizde qubandyq shalý úshin qazaqstandyqtarǵa qansha qarajat qajet? Et qymbattaǵandyqtan, qoidyń eń tómen baǵasy 60 myńnan bastalsa, eń qymbat mal túie úshin 1 million 100 myń teńge kerek eken, dep habarlaidy Dalanews.kz Stan.kz-ke siltep.
Biyl naýryzda elimizde et 2%-dan asa qymbattady. Al mal baǵasy byltyrmen salystyrǵanda biyl 14,5 paiyzǵa ósken. Qurban aitqa qarai mal bazarlarynyń saýdasy júrip, baǵa ústemelene túseri anyq.
Olardyń ishinde qurban aitta eń kóp suranystaǵy túlikterdiń biri qoi:
- Toqty – 60-70 myń teńgeden bastalady;
- Qoi, isek, qoshqar – 80 myń teńgeden joǵary baǵalanǵan.
Qazaqstan musylmandar dini basqarmasy óńirlerdegi mal baǵasyn eseptepti. Munda eń qymbaty: qoi – 100 myń teńge; siyr – 700 myń teńge, túie – 1 100 000 teńgege deiin baǵalanǵan.
Qurban ait qarsańynda tipti bazarlarda saýdagerlermen baǵany kelisetin deldaldardyń da qyzmeti qyza túsedi. Jelide taraǵan video astyndaǵy jazbalarǵa qarasaq, olar tipti mal baǵasyn 40-50 myń teńgege deiin túsirip beredi eken.
Qurbandyq shalýǵa qarajaty bolsa da, densaýlyq jaǵdaiy kelmese nemese belgili bir sebeptermen ózi baryp bul mindetterdi oryndai almasa, azamattar aqshasyn aýdaryp, onlain túrde qurbandyq shala alady.
“Biyl da elimizde Qurban shalý onlain jáne offlain formatta ótedi. Dini basqarma halyqqa qolaily jaǵdai jasaý maqsatynda qurban shalý rásimin qashyqtan ótkizýge arnalǵan qurban.muftyat.kz saityn iske qosty. Dinimizde qurbandyq shalý rásimin basqa bireýge tapsyryp, ony ókil ete alady. Eger ózi bara almasa, bir kisige ótinish jasap, qurban shalýǵa ruqsat etilgen. Demek onlain formatta qurban shalýǵa tapsyrys bere alasyzdar”, — dedi Bas múfti QMDB-da ótken baspasóz máslihatynda.
