Sońǵy úsh jylda Jetisý oblysyndaǵy Kerbulaq aýdanynda 260 turǵyn baspanaǵa ie bolsa, biyl taǵy 368 úi beriledi. Solardyń ishinde apatty úilerdiń turǵyndary da bar. Osy sharalardyń nátijesinde jyl sońyna qarai turǵyn úi kezegi 28%-ǵa qysqarady dep kútilýde. Bul týraly aýdan turǵyndarymen kezdesý barysynda aityldy,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
- Biyl jyl sońynda paidalanýǵa beriletin 60 páterlik eki bes qabatty turǵyn úidiń biri nesielik úi retinde, ekinshisi apatty jaǵdaidaǵy turǵyn úilerde turatyn azamattardy kóshirý maqsatynda salynyp otyr. Sonymen qatar osy jyly áleýmettik jaǵynan az qamtylǵan otbasylarǵa tabystaý úshin jyl aiaǵyna deiin 188 turǵyn úi satyp alamyz. Budan bólek kezekte turǵan osy sanattaǵy otbasylarǵa arnap 60 páterli turǵyn úi salynyp jatyr, qazan aiynda tabystalady, - degen oblys ákiminiń birinshi orynbasary Álibek Jaqanbaev turǵyn úi berý fýnktsiiasy jergilikti artqarýshy organnan "Otbasy bankke" berilgenin atap ótti.
Baiandamasyn jalǵastyrǵan ol aýdandaǵy infraqurylymdy damytý máselelerine toqtaldy. Bul rette Saryózek aýylyndaǵy aýyz sý problemasy jyldar boiy ózekti bolyp kelgen. Qazir aýyz sý júiesin jańǵyrtýdyń 5-shi kezeńi júrip jatyr. Búgingi kúni 98 shaqyrym sýqubyry júiesiniń 50 shaqyrymy aýystyrylyp, 98 qudyq ornatyldy. Joba aiaqtalǵanda aýyz sý máselesi tolyq sheshiledi. Ótken jyly Qarymsaq, Shaǵan, Qarashoqy aýyldaryndaǵy sý júiesi qaita jańǵyrtylyp, eldi meken turǵyndary taza aýyz sýǵa qol jetkizdi. Al biyl Aqbastaý, Tastyózek aýyldarynda da osyndai jumystar júrgizilýde, joba kelesi jyly aiaqtalady.
Aýdannyń áleýmettik infraqurylymyn damytýǵa da kóp kóńil bólinedi. Bilim berý salasynda biyl Qoǵaly, Jańalyq aýyldarynyń mektepterine aǵymdaǵy jóndeý jumystary júrgizilip, Kóksai aýylynda 60 oryndyq mektep salynýda. Shanhanai, Qaraǵash jáne Saryózek aýyldaryna oqýshylar tasymaldaý úshin 3 avtobýs berildi.
Densaýlyq saqtaý salasynda byltyr Saryózek aýylynda 250 adam qabyldaityn emhana qoldanysqa berilip, Onjas, Kóksai, Rýdnik-Arqarly, Jolaman, Qazansý, Qarlyǵash, Tastybastaý, Qyzylmektep aýyldarynda meditsinalyq pýnktter ornatylsa, jyl sońyna deiin Kóktal aýylynda medpýnkt, Saryózek aýylynda Jedel járdem stantsiiasy ashylady. «Aýyldaǵy densaýlyq saqtaýdy jańǵyrtý» ulttyq jobasy aiasynda aýdanda 17 nysan salynýda, atap aitqanda, 9 dárigerlik ambýlatoriia, 6 feldsherlik-akýsherlik jáne 2 meditsinalyq pýnkt jyl sońyna deiin paidalanýǵa beriledi, al «Aýyl – El besigi» baǵdarlamasy aiasynda Kóksý, Shanhanai, Taldybulaq aýyldarynda dárigerlik ambýlatoriialar boi kóterýde. Qurylys jumystary jyl sońyna deiin aiaqtalady. Sonyń nátijesinde sońǵy eki jylda aýdannyń 63 eldi mekeniniń 30-ynda densaýlyq saqtaý infraqurylymy jańartylady. Taǵy da bir aita keterligi, aýdandyq aýrýhanany qaita jańǵyrtýǵa arnaiy memlekettik qordan qarjy bólindi, jumystaryn kelesi jyly aiaqtaý josparlanǵan.
Mádeniet salasyna kelsek, byltyr Shubar, Qoiankóz aýyldarynda blokty-modýldi klýb ornatylyp, Qoǵaly aýylynyń mádeniet úii kúrdeli jóndeýden ótti. Al biyl Saryózek aýylynda kitaphananyń qurylysy júrgizilýde, kelesi jyly iske qosylady.
Jalpy eseptik kezdesý barysynda aýdan halqynyń turmys sapasyn jaqsartý baǵytynda qabyldanyp jatqan sharalarǵa jáne áleýmettik-ekonomikalyq damýdyń negizgi baǵyttaryna basa nazar aýdaryldy.
Kezdesý barysynda aýyl turǵyndary ózderin tolǵandyrǵan suraqtaryn qoiyp, usynys-tilekterin jetkizdi.
Basshi okrýginiń turǵyndaryn kóshe jaryǵy máselesi alańdatady. Jiynda atalǵan okrýgke qaraityn Basshi, Nurym, Aqtóbe aýyldarynda bul máseleni sheshý úshin jobalyq-smetalyq qujattama ázirlengeni aityldy.
Qarymsaq aýylynyń turǵyny aýyldyń basty kóshelerinde asfalttyń joqtyǵyna shaǵymdandy. Osyndai másele Taldybulaq aýyldyq okrýginen kelgen Bolat Asanov tarapynan da kóterildi. Bul rette joldardy jóndeý jumystary kezeń-kezeńimen júzege asyrylatyny habarlandy.
Sonymen qatar Bostan aýylyndaǵy Shaiahmetov kóshesiniń jóndeý jumystaryn kelesi aptada bastaý josparlanǵan. Jáne de Qarashoqy aýylyna aparatyn kireberis joldyń jóndeýin qazan aiyna deiin aiaqtaý tapsyryldy.
Sarybulaq aýyly mańyndaǵy 2-shi ferma turǵyny Abdýl Konchiev aýyz sý jáne bailanys máselelerin kóterdi. Atalǵan aýmaq fazenda sanalady, onda 9 úi ornalasqan, byltyr elektr energiiasy máselesi sheshilgennen keiin, biyl bul jerge sý da tartyldy. Endi demeýshiniń esebinen isten shyqqan sý sorǵysy men qajetti jabdyqtar satyp alynyp, jaqyn arada aýyz sý máselesi sheshimin tabatyn bolady.
Aýdan turǵyndaryn Qoiankóz, Malaisary aýyldarynda sport keshenderiniń qurylysy, memlekettik turǵyn úi qorynan baspana bólý, aýyz sýmen úzdiksiz qamtamasyz etý, meditsinada salalyq mamandardyń jetispeýshiligi, káriz júielerin jóndeý jáne salý siiaqty máseleler de tolǵandyrdy.
Kezdesýde jalpy sany 20-dan astam suraq qoiylyp, olardyń barlyǵyna jaýapty tulǵalar tarapynan naqty túsiniktemeler berildi.
Á. Jaqanbaev óz sózinde oblys ákiminiń tapsyrmasyna sáikes eń aldymen halyqty aýyz sýmen, sapaly meditsinalyq qyzmetpen, jolmen, turǵyn úimen jáne gazben qamtamasyz etý máseleleri sheshilip jatqanyn aitty. Sonymen qatar ózge de týyndaǵan máseleler óńirdi damytý josparyna sáikes kezeń-kezeńimen sheshiletin bolady.
Sol kúni azamattardy jeke máseleleri boiynsha qabyldaý ótkizildi. Onyń barysynda turǵyndar negizinen jer jáne turǵyn úi máselelerin kóterdi.
Máselen, Saryózek aýylynyń turǵyny Rashida Dáýletova Saryózek aýylyndaǵy gazben qamtylmaǵan úilerdiń qashan gazdandyrylatynyn surady. Bul máselege qatysty buryn gaz jelisi tartylmaǵan úilerge gaz qubyryn júrgizý kelesi jyldyń I jartysynda aiaqtalady dep josparlanǵany aityldy.
