Májilis depýtaty Ashat Aimaǵambetov Qazaqstannyń jekemenshik mektepterindegi birqatar máselege toqtaldy, dep habarlaidy Dalanews.kz.
Depýtattyń aitýynsha, birneshe jyl buryn Qazaqstanda jekemenshik mektepterdiń sany nebári 25-30 ǵana bolsa, búgingi kúni olardyń sany 800-den asqan. Munyń bári mektepterdegi úsh aýysymdyq máseleni sheshýde zor ról atqarǵanyn atap ótti.
“Jeke mektepter jelisi tez damyp, memleket mektepterdegi úsh aýysymdylyq máselesin, ásirese ońtústik óńirler men iri qalalarda, sheshýge múmkindik aldy. Júzdegen myń jańa oqýshy orny qurylyp, júzdegen memlekettik mektep úsh aýysymdylyqtan qutyldy. Muny joqqa shyǵarý múmkin emes. Jeke mektepterge ártúrli kózqaras bolýy múmkin, olardyń sapaǵa qatysty problemalary da bar, biraq mektepter arasynda alternativa men básekelestiktiń bolýy jalpy júie úshin paidaly”, — deidi ol.
Aimaǵambetov jeke mektepterge qatysty máselelerdi tizbektep shyqty. Onyń sózinshe, mundai bilim ordalary bankrot bolýdyń aldynda tur.
“Qazir jeke mektepterdiń damýy alańdaýshylyq týdyryp otyr. Kóptegen mektepter, ásirese ata-analardan qosymsha qarajat almai, tek memlekettik tapsyrys esebinen jumys isteitinderi, bankrot bolýdyń az-aq aldynda tur.
Nelikten? Óitkeni memlekettik qarjylandyrý úlken keshigýlermen túsedi. Bul tek esep berý qujattaryndaǵy sandar emes – bul muǵalimderdiń jalaqysy, kommýnaldyq qyzmetter, salyqtar. Onyń ústine, kóptegen mektep 2023 jáne 2024 jyldarǵa arnalǵan qarjylandyrýdy áli kúnge deiin tolyǵymen almady”, - dep qosty Aimaǵambetov.
Osy tusta depýtat jaǵdaidyń jyl saiyn ýshyǵyp bara jatqanyn alǵa tartty.
“Biyl jaǵdai odan ári nasharlaýy yqtimal. Jeke mektepterdi qarjylandyrý respýblikalyq biýdjetten jergilikti biýdjetke berildi. Alaida qoldaǵy aqparatqa sáikes, barlyq ákimdikter bul ózgerister týraly bilip, tiisti qarjylandyrýdy tolyǵymen bólgen joq. Qazirgi tańda keminde 80 mlrd teńgege jýyq qarajat jetispeidi. Jaqyn arada bul másele sheshilip, mektepterdiń úzdiksiz qarjylandyrylýy qamtamasyz etiledi dep úmittenemin, - dep qorytyndylady sózin.
