ءماجىلىس دەپۋتاتى اسحات ايماعامبەتوۆ قازاقستاننىڭ جەكەمەنشىك مەكتەپتەرىندەگى ءبىرقاتار ماسەلەگە توقتالدى، دەپ حابارلايدى Dalanews.kz.
دەپۋتاتتىڭ ايتۋىنشا، بىرنەشە جىل بۇرىن قازاقستاندا جەكەمەنشىك مەكتەپتەردىڭ سانى نەبارى 25-30 عانا بولسا، بۇگىنگى كۇنى ولاردىڭ سانى 800-دەن اسقان. مۇنىڭ ءبارى مەكتەپتەردەگى ءۇش اۋىسىمدىق ماسەلەنى شەشۋدە زور ءرول اتقارعانىن اتاپ ءوتتى.
“جەكە مەكتەپتەر جەلىسى تەز دامىپ، مەملەكەت مەكتەپتەردەگى ءۇش اۋىسىمدىلىق ماسەلەسىن، اسىرەسە وڭتۇستىك وڭىرلەر مەن ءىرى قالالاردا، شەشۋگە مۇمكىندىك الدى. جۇزدەگەن مىڭ جاڭا وقۋشى ورنى قۇرىلىپ، جۇزدەگەن مەملەكەتتىك مەكتەپ ءۇش اۋىسىمدىلىقتان قۇتىلدى. مۇنى جوققا شىعارۋ مۇمكىن ەمەس. جەكە مەكتەپتەرگە ءارتۇرلى كوزقاراس بولۋى مۇمكىن، ولاردىڭ ساپاعا قاتىستى پروبلەمالارى دا بار، ءبىراق مەكتەپتەر اراسىندا التەرناتيۆا مەن باسەكەلەستىكتىڭ بولۋى جالپى جۇيە ءۇشىن پايدالى”، — دەيدى ول.
ايماعامبەتوۆ جەكە مەكتەپتەرگە قاتىستى ماسەلەلەردى تىزبەكتەپ شىقتى. ونىڭ سوزىنشە، مۇنداي ءبىلىم وردالارى بانكروت بولۋدىڭ الدىندا تۇر.
“ءقازىر جەكە مەكتەپتەردىڭ دامۋى الاڭداۋشىلىق تۋدىرىپ وتىر. كوپتەگەن مەكتەپتەر، اسىرەسە اتا-انالاردان قوسىمشا قاراجات الماي، تەك مەملەكەتتىك تاپسىرىس ەسەبىنەن جۇمىس ىستەيتىندەرى، بانكروت بولۋدىڭ از-اق الدىندا تۇر.
نەلىكتەن؟ ويتكەنى مەملەكەتتىك قارجىلاندىرۋ ۇلكەن كەشىگۋلەرمەن تۇسەدى. بۇل تەك ەسەپ بەرۋ قۇجاتتارىنداعى ساندار ەمەس – بۇل مۇعالىمدەردىڭ جالاقىسى، كوممۋنالدىق قىزمەتتەر، سالىقتار. ونىڭ ۇستىنە، كوپتەگەن مەكتەپ 2023 جانە 2024 جىلدارعا ارنالعان قارجىلاندىرۋدى ءالى كۇنگە دەيىن تولىعىمەن المادى”، - دەپ قوستى ايماعامبەتوۆ.
وسى تۇستا دەپۋتات جاعدايدىڭ جىل سايىن ۋشىعىپ بارا جاتقانىن العا تارتتى.
“بيىل جاعداي ودان ءارى ناشارلاۋى ىقتيمال. جەكە مەكتەپتەردى قارجىلاندىرۋ رەسپۋبليكالىق بيۋدجەتتەن جەرگىلىكتى بيۋدجەتكە بەرىلدى. الايدا قولداعى اقپاراتقا سايكەس، بارلىق اكىمدىكتەر بۇل وزگەرىستەر تۋرالى ءبىلىپ، ءتيىستى قارجىلاندىرۋدى تولىعىمەن بولگەن جوق. قازىرگى تاڭدا كەمىندە 80 ملرد تەڭگەگە جۋىق قاراجات جەتىسپەيدى. جاقىن ارادا بۇل ماسەلە شەشىلىپ، مەكتەپتەردىڭ ۇزدىكسىز قارجىلاندىرىلۋى قامتاماسىز ەتىلەدى دەپ ۇمىتتەنەمىن، - دەپ قورىتىندىلادى ءسوزىن.
