Biyl Elordada 15 mektep salynady
2019 jyly elimizdiń bas qalasynda úsh aýysymda oqityn segiz mektep bolatyn, al 2020 jyly olardyń sany eki ese azaiǵan. Osylaisha oqý oryndarynyń shamadan tys jumys isteý problemasy tómendep keledi. Memleket basshysynyń tapsyrmalaryn oryndaý aiasynda sońǵy eki jylda qalanyń túrli aýdanynda 12 myńnan astam oqýshyǵa arnalǵan 18 bilim berý nysany ashyldy.
Elordada 2021 jyly taǵy 15 mektep memlekettik biýdjet qarajaty esebinen de, memlekettik-jekemenshik áriptestik jáne jeke investitsiialar kózinen de salynatyn bolady.
Qabyldanyp jatqan sharalar elordadaǵy mektepterdiń jetispeýshilik problemasyn sheshýge múmkindik beredi.
– Elorda osyndai kólemde ǵana salynady degen naqty jospar belgilengen joq. Qalamyz kún sanap ósip keledi, tiisinshe mektepter jetispeidi. Aita keterlik másele, tapshylyqty azaitý qajet. Bul qiyndyqtyń aldyn alý úshin kóbirek mektep salynyp jatyr. Qazirgi Nur-Sultan endigi 20 jyldan keiin úlkeiip, áýejaiymyz Londondaǵydai qala ortalyǵynda bolýy múmkin. Qalanyń ósip kele jatqanyn seziný kerek. Ákimdik atqaryp jatqan sharýalarǵa kóz salsaq, bári der kezinde júrgizilip jatqanyn baiqaýǵa bolady. Biyl 16 mektep salynady, bul úlken jetistik dep sanaimyn, – dep atap ótti saiasattanýshy Samat Nurtaza.
Eske sala keteiik, jaqynda elordada birneshe áleýmettik nysan ashyldy. Olardyń arasynda kózi nashar kóretin balalarǵa arnalǵan mamandandyrylǵan balabaqsha da bar.
Balabaqshada tárbieshilermen qatar meditsina qyzmetkerleri de jumys isteidi. Bul balanyń fizikalyq, psihikalyq damý erekshelikterin, jeke múmkindikteri men qabiletterin eskere otyryp, balany jan-jaqty damytýǵa, mektepke daiyndyǵyn qamtamasyz etedi. Mekemede fizioterapiia, logoped-defektolog, oftalmolog jáne t.b. kabinetter bar.
Osyǵan deiin elorda ákimi Altai Kólginov qalada oqý oryndarynyń qurylysyna kóp kóńil bólinetinin atap ótken bolatyn.
– Almaty aýdanynda 2400 oryndyq mektep salynyp, ashylýǵa daiyn. Oqý ornynda inkliýziia, «Abaitaný», «STEM», «Intellektým» kabinetteri jáne beinesabaqtardy túsirýge arnalǵan stýdiia bar. Bul balalardyń jan-jaqty damýyna múmkindik beredi. Elordada aldaǵy 5 jylǵa 67 mekteptiń qurylysy josparlanyp otyr. Oqý oryndarynyń qurylysyna da jeke investitsiia tartylady, – dedi ákim.
