QR Mádenıet jáne aqparat mınıstrliginiń qoldaýymen BUU halyqaralyq eriktilerdi qabyldaıdy, dep habarlaıdy Dalanews.kz.
Volonterler uzartý múmkindigi bar 1 jyldyq kelisim-shartpen Kenıa, Taıland jáne Túrkıadaǵy BUU-nyń ártúrli qurylymdyq bólimshelerine joldanady. Ótinish berýshilerdiń tájirıbesi men jasyna baılanysty jastar jáne mamandar sanatyndaǵy 7 pozısıa qoljetimdi. Volonterlerdi irikteý boıynsha barlyq rásimder BUUE reglamentine sáıkes 14 aqpandy qosa alǵanda júzege asady.
"2019 jyly QR úkimeti men BUU Eriktiler baǵdarlamasy arasynda qazaqstandyq volonterlerdiń BUU halyqaralyq volonterleri retinde qatysýyn kózdeıtin kelisim jasalǵan. Baǵdarlama álemdegi turaqty damý máselelerin sheshýde jáne Turaqty damý maqsattaryna qol jetkizýde BUU júıesiniń bir bóligi retinde, qazaqstandyq eriktilerdiń halyqaralyq áriptesterimen bilim jáne tájirıbe almasý múmkindigin qamtamasyz etý úshin qurylǵan", - dep jazdy mınıstrlikten.
Osy ýaqyt ishinde 7 qazaqstandyq BUU qurylymynyń ártúrli bólimshesinde ózderiniń volonterlyq qyzmetin júzege asyrdy. Kelisimsharttary aıaqtalǵannan keıin 6 qazaqstandyq erikti BUU-nyń dúnıe júzindegi bólimshelerinde jumys isteýge shaqyryldy.
