Atyraý oblysynda Qarabalinder otbasynyń qazasyna qatysty rezonansty is boiynsha sot otyrysynda marqum Maqsot Qarabalinniń jieni Farizat Kenjeǵalieva jaýap berdi. Ol tergeý aiaqtalǵannan keiin ózine túsiniksiz bolyp qalǵan birneshe jaǵdaidy aityp, kúmánin jasyrmady, dep habarlaidy dalanews.kz.
Kýágerdiń sózinshe, tergeý jumystary bitken soń marqumdardyń úiiniń kilti oǵan tapsyrylǵan. Sodan keiin ol úige kún saiyn baryp júrgen. Alaida bir kúni úiden buryn bolmaǵan ekinshi kilt tabylyp, bul jaǵdai onyń kúdigin kúsheitken.
“Tergeý aiaqtalǵan soń kiltti maǵan berdi. Men kúnde sol úige baryp júrdim. Bir kúni tústen keiin ekinshi kilt paida boldy. Ony kim ákeldi? Buǵan deiin ondai kilt múlde bolmaǵan. Barlyǵy bir ǵana kiltpen kirip-shyǵatyn. Politseiler alǵash kelgende úige esikti buzyp kirip, kiltti ishinen tapqan edi”, – dedi Farizat Kenjeǵalieva sotta.
Onyń aitýynsha, qaiǵyly oqiǵa bolǵan úide qonaq kútýge daiyndyq jasalǵandai áser qalǵan. Sebebi Naýryz Muqanǵaliev týystaryna kúieýbalasynyń otbasymen qonaqqa keletinin aldyn ala aitqan.
“Aǵam mal soiyp, et daiyndap qoiǵan. Qonaq kútýge qamdanǵan. Mundai jaǵdaiǵa qalai barǵanyn áli kúnge deiin túsine almaimyn”, – dedi kýáger.
Farizat Kenjeǵalievanyń sózinshe, otbasy joǵalǵannan keiin úige kirgender onyń erekshe jinaqy turǵanyn baiqaǵan.
“Úige kirgende bári óz ornynda turǵanyn kórdik. Úi ieleri az ýaqytqa ǵana shyǵyp ketkendei áser qaldyrdy. Ydystar jýylǵan, úi jinalǵan. Soiylǵan ettiń bir bóligi tońazytqyshqa salynyp qoiylǵan”, – dedi ol.
Sotta kýáger taǵy bir boljamyn aitty. Onyń pikirinshe, Sultan Sársemáliev Naýryzdyń telefonyn paidalanyp, týystarymen hat almasqan bolýy múmkin. Osylaisha ol jaqyndarynyń kúdigin seiiltip, olardy adastyrýǵa tyrysqan bolýy yqtimal ekenin jetkizdi.
“Men alǵashqy kúnnen bastap aǵamnyń úiinde boldym. Aǵam men jeńgemniń máiiti tabylǵan kezde de sol jerde júrdim”, – dedi Farizat Kenjeǵalieva.
Qarabalinder otbasynyń qazasyna qatysty sot protsesi qoǵam nazarynda tur. Is barysynda aitylǵan árbir jańa derek marqumdardyń jaqyndary men kópshiliktiń suraǵyn odan saiyn kóbeitip otyr.
