اتىراۋ وبلىسىندا قاراباليندەر وتباسىنىڭ قازاسىنا قاتىستى رەزونانستى ٸس بويىنشا سوت وتىرىسىندا مارقۇم ماقسوت قاراباليننٸڭ جيەنٸ فاريزات كەنجەعاليەۆا جاۋاپ بەردٸ. ول تەرگەۋ اياقتالعاننان كەيٸن ٶزٸنە تٷسٸنٸكسٸز بولىپ قالعان بٸرنەشە جاعدايدى ايتىپ, كٷمەنٸن جاسىرمادى, دەپ حابارلايدى dalanews.kz.
كۋەگەردٸڭ سٶزٸنشە, تەرگەۋ جۇمىستارى بٸتكەن سوڭ مارقۇمداردىڭ ٷيٸنٸڭ كٸلتٸ وعان تاپسىرىلعان. سودان كەيٸن ول ٷيگە كٷن سايىن بارىپ جٷرگەن. الايدا بٸر كٷنٸ ٷيدەن بۇرىن بولماعان ەكٸنشٸ كٸلت تابىلىپ, بۇل جاعداي ونىڭ كٷدٸگٸن كٷشەيتكەن.
“تەرگەۋ اياقتالعان سوڭ كٸلتتٸ ماعان بەردٸ. مەن كٷندە سول ٷيگە بارىپ جٷردٸم. بٸر كٷنٸ تٷستەن كەيٸن ەكٸنشٸ كٸلت پايدا بولدى. ونى كٸم ەكەلدٸ? بۇعان دەيٸن ونداي كٸلت مٷلدە بولماعان. بارلىعى بٸر عانا كٸلتپەن كٸرٸپ-شىعاتىن. پوليتسەيلەر العاش كەلگەندە ٷيگە ەسٸكتٸ بۇزىپ كٸرٸپ, كٸلتتٸ ٸشٸنەن تاپقان ەدٸ”, – دەدٸ فاريزات كەنجەعاليەۆا سوتتا.
ونىڭ ايتۋىنشا, قايعىلى وقيعا بولعان ٷيدە قوناق كٷتۋگە دايىندىق جاسالعانداي ەسەر قالعان. سەبەبٸ ناۋرىز مۇقانعاليەۆ تۋىستارىنا كٷيەۋبالاسىنىڭ وتباسىمەن قوناققا كەلەتٸنٸن الدىن الا ايتقان.
“اعام مال سويىپ, ەت دايىنداپ قويعان. قوناق كٷتۋگە قامدانعان. مۇنداي جاعدايعا قالاي بارعانىن ەلٸ كٷنگە دەيٸن تٷسٸنە المايمىن”, – دەدٸ كۋەگەر.
فاريزات كەنجەعاليەۆانىڭ سٶزٸنشە, وتباسى جوعالعاننان كەيٸن ٷيگە كٸرگەندەر ونىڭ ەرەكشە جيناقى تۇرعانىن بايقاعان.
“ٷيگە كٸرگەندە بەرٸ ٶز ورنىندا تۇرعانىن كٶردٸك. ٷي يەلەرٸ از ۋاقىتقا عانا شىعىپ كەتكەندەي ەسەر قالدىردى. ىدىستار جۋىلعان, ٷي جينالعان. سويىلعان ەتتٸڭ بٸر بٶلٸگٸ توڭازىتقىشقا سالىنىپ قويىلعان”, – دەدٸ ول.
سوتتا كۋەگەر تاعى بٸر بولجامىن ايتتى. ونىڭ پٸكٸرٸنشە, سۇلتان سەرسەمەليەۆ ناۋرىزدىڭ تەلەفونىن پايدالانىپ, تۋىستارىمەن حات الماسقان بولۋى مٷمكٸن. وسىلايشا ول جاقىندارىنىڭ كٷدٸگٸن سەيٸلتٸپ, ولاردى اداستىرۋعا تىرىسقان بولۋى ىقتيمال ەكەنٸن جەتكٸزدٸ.
“مەن العاشقى كٷننەن باستاپ اعامنىڭ ٷيٸندە بولدىم. اعام مەن جەڭگەمنٸڭ مەيٸتٸ تابىلعان كەزدە دە سول جەردە جٷردٸم”, – دەدٸ فاريزات كەنجەعاليەۆا.
قاراباليندەر وتباسىنىڭ قازاسىنا قاتىستى سوت پروتسەسٸ قوعام نازارىندا تۇر. ٸس بارىسىندا ايتىلعان ەربٸر جاڭا دەرەك مارقۇمداردىڭ جاقىندارى مەن كٶپشٸلٸكتٸڭ سۇراعىن ودان سايىن كٶبەيتٸپ وتىر.
