Bursa: Týrizm men sport sammiti
Bursa qalasyna túrki elderinen jinalǵan jýrnalister qaýymy «Sportta zorlyq-zombylyqqa jol joq» degen taqyrypta Týrizm jáne sport sammitin ótkizdi.
Anadoly Sport jýrnalisteri assotsiatsiiasynyń uiymdastyrýymen bolǵan bul sharaǵa Qazaqstannan da BAQ ókilderi qatysty.
Sammitke Qazaqstanmen birge Túrkiia, Qyrǵyzstan, Ázirbaijan, Túrkimenstan, Resei, Belgiia, Germaniia, Frantsiia tb elderdiń buqaralyq aqparat quraldarynyń ókilderi qatysty.
Hancherli medresesi Mádeniet ortalyǵynda bolǵan Sammitke Bursa qalasynyń ákimi Alinur Aktash, Iyldyrym aýdanynyń ákimi Ismail Hakky, Niliýfer aýdany ákiminiń orynbasary Fyrat Emiroǵlu, Saýda birjasynyń Májilis basshysy Mehmet Aidyn qatysty. Resmi bilik ókilderine biz Túrkitildes jýrnalister qory atynan shapan jaýyp, qazaqtyń ulttyq qundylyǵy — dombyrany syiǵa tarttyq.
Shapan men dombyraǵa riza bolǵan Bursa qalasynyń ákimi mundai syilyqty alǵash ret alǵanyn jáne jumys kabinetiniń eń syily jerine ornalastyratynyn aityp, alǵysyn bildirdi.
Týrizm jáne sport sammiti úsh otyrysty qamtydy. Alǵashqy otyrysta qatysýshylar «Sportta zorlyq-zombylyq pen tártipsizdiktiń aldyn alý» degen máseleni talqyǵa saldy. Ulydaǵ ýniversiteti Sport fakýltetiniń professorlary Súleiman Shahin men Erkýt Týtkýn, Manisadaǵy Djelal Baiar ýniversiteti Sport fakýltetiniń professory Redjep Djengiz sporttaǵy zorlyq-zombylyqtyń aldyn alý sharttary otbasyndaǵy tárbieden bastalatynyn, mektepterde bilim berý barysynda oqytýshylar tarapynan balalar men jastarǵa qoqan-loqqy, zorlyq-zombylyq, qiianat jasaýdyń adami qaǵidalarǵa jatpaitynyn úiretý kerektigine toqtaldy.
Ekinshi otyrysta «Sport basylymdarynda kóterilgen máselelerdiń quzyrly organdarǵa yqpaly» sóz boldy. Pikir bildirýshiler maqala jazǵan ne suhbat alǵan jýrnalistiń zorlyq-zombylyqty nasihattaýǵa abai bolýymen qatar sport klýbtarynyń jetekshileri de dál osy máselege jaýapty ekendigin aitty. Óitkeni sport oiyndarynda, ásirese, fýtbolda básekeles oiynshylardy oiyn alańynan alastaý úshin keide qasaqana ziian keltirý, iterip jiberý, shalyp jyǵý ne aiaǵynan tebý siiaqty tásilder jii qoldanylady. Mundaidyń sońy keide fýtbolshynyń súiikti isimen múlde qosh aitysýyna ákep soǵatyny jasyryn emes. Osyny alǵa tartqan BAQ ókilderi sport klýbtarynyń tártip buzǵan oiynshysymen qatar jattyqtyrýshysy da jaýap berýi tiis dedi.
«Týrizm men sporttyń bailanysy jáne sporttyq sharalardyń týrizmde alatyn orny» taqyrybyndaǵy úshinshi otyrysta kez kelgen eldi halyqaralyq deńgeide tanytýǵa sep bolatyn sportqa barynsha kóńil bólinýi kerektigi talqylandy. Máselen, orta mektep oqýshylary geografiiany jaqsy bilmese de, qalalardyń atynan qurylǵan fýtbol komandalaryn jaqsy biledi. Fýtbolshylardyń oiynyna súisingen árbir jas pen kári mindetti túrde Internet arqyly fýtbolshy men onyń Týǵan jeri týraly aqparat jinaidy, ózgelerge nasihattaidy. Bul týrizmniń damýyna sep bolary anyq.
«Túrkitildes jýrnalister qory» QQ.
