Qazaqstanda Burger King Kazakhstan jelisine qatysty daý kúsheiip keledi, dep habarlaidy Dalanews.kz.
Daýdyń týyndaýyna áleýmettik kásipker Janat Karataidyń áleýmettik jelidegi jazbasy sebep boldy. Ol aýtizm spektrindegi buzylysy bar 27 jastaǵy uly Álibektiń eńbek joly men sońǵy ýaqytta bolǵan jaǵdaidy baiandaǵan.
«Aýtizmi bar ulym Álibek Qaratai. Kópshilik ony tanidy. Qazir ol 27 jasta. 1998 jyly dúniege keldi. Eki jasynda-aq bir nárseniń durys emes ekenin baiqadyq. Ol – ekinshi balam. Sóilemedi, tilge kelmedi. Ol kezde “aýtizm” degen uǵym da, tipti “sóileý damýynyń kesheýildeýi” degen túsinik te keń taralmaǵan edi. Men IT salasyndaǵy jumysymdy, bolashaǵy zor mansabymdy tastap, bárin ózim zerttep, balammen ainalysýǵa bel býdym. Jyldar boiy pedagogika men ońaltýǵa tolyqtai den qoidyq. Sonyń nátijesinde ol mektepti bitirip, Júrgenov atyndaǵy kolledjde oqydy, músinshi mamandyǵyn meńgerdi, plastilinnen animatsiialyq mýltfilmder jasaýǵa qyzyqty. Ártúrli jerde jumys istep kórdi. Aqyry ózine unaityn ujym men mamandyqty tapty – Burger King-te aspaz bolyp eńbek etti», – dep jazdy anasy.
Onyń aitýynsha, Álibek tórt jyl boiy turaqty jumys istep, jalaqy alyp, ózin ujymnyń tolyqqandy múshesi retinde sezingen.
«Tórt jyl boiy úzdiksiz jumys istedi, jalaqy aldy, tapqan tabysyn qýana jumsady. Ujymǵa qajet ekenin sezindi. Jumys qyzǵan kezde qosymsha aýysymdarǵa qalatyn. Demalysyn ózi josparlap, bir filialdan ekinshisine aýysyp júrdi. Bul – bizdiń otbasynyń meiramhana ákimshileri men menedjerlerimen birlesken eńbeginiń nátijesi. Bizge qoldaý kórsetken Shirin esimdi menedjerge jáne Álibektiń tikelei jetekshisi Erlanǵa ómir boiy rizamyz», – deidi Janat Karatai.
Alaida, onyń sózinshe, jańa óńirlik basshy kelgennen keiin jaǵdai ózgergen.
«Jańa óńirlik basshy Sergei kelgen sátten bastap bári ózgerdi. Jasyryn qysym bastaldy. Kúzden beri Álibek múlde ózgerip ketti, ne bolyp jatqanyn túsinbedik. Keiin onyń jumystan ketýge itermelenip jatqanyn estidik. Qazir ózimizdi qolǵa alyp, Álibektiń adamdarǵa degen senimin qaita qalpyna keltirýge tyrysyp jatyrmyz. Budan artyq aita almaimyn. Osyndai jaǵdaida qalai ómir súrýge bolady? Bir adam jyldar boiy qalyptasqan júieni buza salýy múmkin be? Onymen jeke sóileskende, tiri adammen emes, sezimsiz mehanizmmen sóileskendei boldym. Ol bizdiń elge jaqynda ǵana kelgen, inkliýzivti qoǵam týraly túsinigi joq. Aýtizmi bar adamdardyń ózgelermen teń dárejede jumys istei alatynyn estimegen de», – dep jazdy ol.
Óz kezeginde Burger King Kazakhstan áleýmettik jelidegi jazbaǵa qatysty resmi málimdeme jasady.
«Bizdiń Dostyk Plaza saýda ortalyǵyndaǵy meiramhanamyzdyń burynǵy qyzmetkerine qatysty jariialanymdy kórdik. Eń aldymen, bul jaǵdai otbasy úshin aýyr tigenine shyn júrekten ókinish bildiremiz. Árbir qyzmetker ózin qurmettelgen, qoldaýly ári qaýipsiz ortada sezinýi biz úshin mańyzdy. Burger King Kazakhstan teń múmkindik pen inkliýzivtilik qaǵidattaryn ustanady», – delingen kompaniia habarlamasynda.
Kompaniia ókilderi ishki tekseris bastalǵanyn jáne Álibektiń jumystan shyǵarylmaǵanyn málimdedi.
Alaida jeli qoldanýshylary kompaniia jaýabyna qanaǵattanbaǵan syńaily. Áleýmettik jelilerde teris pikirler kóbeiip, keibir azamattar jelini boikottaýǵa shaqyrýda.
