Aqmola oblysyndaǵy Býrabai men Svetlyi kýrorttyq kentteriniń birneshe myń turǵyny men kásipkerleri úileri men demalys aimaqtarynan aiyrylyp qalýdan qaýiptenip otyr. Óńirlik jer resýrstaryn basqarý departamenti sońǵy 20 jylda jasalǵan barlyq jer mámilelerin joiýdy talap etti. Jeke menshik ielerine sotqa shaqyrý qaǵazdary kelip jatqanyn aitady, dep habarlaidy Dalanews.kz 31 arnaǵa siltep.
Kásipker Igor Streltsov Býrabai kentinen jer telimin bir jyl buryn satyp alǵan. Onyń sózinshe, ol 400 mln teńge quiyp, aýmaqty abattandyrǵan, kommýnikatsiia júrgizip, 24 úi salǵan. Alaida jýyrda sotqa shaqyrý aldy: oblystyq jer resýrstaryn basqarý departamenti barlyq jer mámilesin joiýdy talap etip otyr.
"Bizde árbir bastyrma resmi túrde rásimdelgen. Olar bolsa, «keiin sizge jalǵa berermiz» deidi. Qalaisha? Biz bul jerdi resmi túrde satyp aldyq qoi", – dedi kásipker.
Zańger Saparǵali Qusaiynovtyń aitýynsha, osyndai jaǵdaiǵa shamamen 1800 jer iesi tap bolýy múmkin. Onyń birneshe ondaǵany – kásipkerler, qalǵandary – qarapaiym turǵyndar.
"Biz sottasamyz, talap-aryz beremiz. Biz munda turamyz, bul – bizdiń turaqty mekenimiz, jerimiz rásimdelgen", – dedi aýyl turǵyny Valerii Tishenko.
Resmi túsinikteme
Jer resýrstaryn retteý departamentinde ister Aqmola oblysy prokýratýrasynyń nusqaýymen qozǵalǵanyn aitty. Olardyń dereginshe, ýchaskeler erekshe qorǵalatyn aýmaqtar týraly zańdy buza otyryp berilgen.
