اقمولا وبلىسىنداعى بۋراباي مەن سۆەتلىي كۋرورتتىق كەنتتەرىنىڭ بىرنەشە مىڭ تۇرعىنى مەن كاسىپكەرلەرى ۇيلەرى مەن دەمالىس ايماقتارىنان ايىرىلىپ قالۋدان قاۋىپتەنىپ وتىر. وڭىرلىك جەر رەسۋرستارىن باسقارۋ دەپارتامەنتى سوڭعى 20 جىلدا جاسالعان بارلىق جەر مامىلەلەرىن جويۋدى تالاپ ەتتى. جەكە مەنشىك يەلەرىنە سوتقا شاقىرۋ قاعازدارى كەلىپ جاتقانىن ايتادى، دەپ حابارلايدى Dalanews.kz 31 ارناعا سىلتەپ.
كاسىپكەر يگور سترەلسوۆ بۋراباي كەنتىنەن جەر تەلىمىن ءبىر جىل بۇرىن ساتىپ العان. ونىڭ سوزىنشە، ول 400 ملن تەڭگە قۇيىپ، اۋماقتى اباتتاندىرعان، كوممۋنيكاسيا جۇرگىزىپ، 24 ءۇي سالعان. الايدا جۋىردا سوتقا شاقىرۋ الدى: وبلىستىق جەر رەسۋرستارىن باسقارۋ دەپارتامەنتى بارلىق جەر مامىلەسىن جويۋدى تالاپ ەتىپ وتىر.
"بىزدە ءاربىر باستىرما رەسمي تۇردە راسىمدەلگەن. ولار بولسا، «كەيىن سىزگە جالعا بەرەرمىز» دەيدى. قالايشا؟ ءبىز بۇل جەردى رەسمي تۇردە ساتىپ الدىق قوي"، – دەدى كاسىپكەر.
زاڭگەر ساپارعالي قۇسايىنوۆتىڭ ايتۋىنشا، وسىنداي جاعدايعا شامامەن 1800 جەر يەسى تاپ بولۋى مۇمكىن. ونىڭ بىرنەشە ونداعانى – كاسىپكەرلەر، قالعاندارى – قاراپايىم تۇرعىندار.
"ءبىز سوتتاسامىز، تالاپ-ارىز بەرەمىز. ءبىز مۇندا تۇرامىز، بۇل – ءبىزدىڭ تۇراقتى مەكەنىمىز، جەرىمىز راسىمدەلگەن"، – دەدى اۋىل تۇرعىنى ۆالەريي تيششەنكو.
رەسمي تۇسىنىكتەمە
جەر رەسۋرستارىن رەتتەۋ دەپارتامەنتىندە ىستەر اقمولا وبلىسى پروكۋراتۋراسىنىڭ نۇسقاۋىمەن قوزعالعانىن ايتتى. ولاردىڭ دەرەگىنشە، ۋچاسكەلەر ەرەكشە قورعالاتىن اۋماقتار تۋرالى زاڭدى بۇزا وتىرىپ بەرىلگەن.
