Almatydaǵy QSI halyqaralyq mektebiniń oqýshysy sýitsid jasaýǵa árekettenip, qazir jansaqtaý bóliminde jatyr, dep habarlaidy Dalanews.kz.
Oqiǵa týraly qyzdyń ákesi Qanat Ámirkin málimdedi. Onyń aitýynsha, sońǵy bir jyl boiy mektep ákimshiligine qyzyna qatysty býlling jaiynda birneshe ret shaǵymdanǵan. Alaida, ákeniń sózinshe, bilim ordasy tarapynan naqty shara qabyldanbaǵan. Er adam synyptastary balany mazaqtap, psihologiialyq qysym kórsetkenin, al muǵalimder bul jaǵdaiǵa tiisti deńgeide aralaspaǵanyn aitady.
Oqiǵadan keiin mektepke kelgen áke oqý orny basshylyǵynan salqyn ári formaldy qatynas kórgenin jetkizdi. Onyń aitýynsha, mektep direktory miss Mahon jaǵdaidyń aýyrlyǵyn tolyq túsinbegendei áser qaldyrǵan.
«Meni tómendetkendei, joǵarydan qarady. Mektep qabyrǵasynda bala ólim aýzynda jatyr, al olardyń jaýaby: “Sizderdiń elderińizde sýitsid kóp qoi, biz ne istei alamyz?” degenge saiady. Bul jylyna 25 myń dollar turatyn mekteptiń “qamqorlyǵy” ma?» – dep jazdy ol áleýmettik jelidegi jazbasynda.
Sonymen qatar, ákesi býllingke qatysqan oqýshylardyń biri joǵary laýazymdy sheneýniktiń qyzy bolýy múmkin ekenin de meńzedi.
Aǵartý ministrliginiń Balalardyń quqyqtaryn qorǵaý komiteti jaǵdaidyń baqylaýǵa alynǵanyn habarlady. Mektepke mobildi psihologiialyq kómek toby jiberilip, zardap shekken balaǵa jeke qoldaý uiymdastyrylady. Oqý ornyna profilaktikalyq jumys júrgizý usynylǵan.
Almaty qalalyq politsiia departamenti býlling faktisi boiynsha qylmystyq is qozǵalǵanyn málimdedi. Tergeý amaldary bastaldy.
