الماتىداعى QSI حالىقارالىق مەكتەبىنىڭ وقۋشىسى سۋيسيد جاساۋعا ارەكەتتەنىپ، ءقازىر جانساقتاۋ بولىمىندە جاتىر، دەپ حابارلايدى Dalanews.kz.
وقيعا تۋرالى قىزدىڭ اكەسى قانات امىركىن مالىمدەدى. ونىڭ ايتۋىنشا، سوڭعى ءبىر جىل بويى مەكتەپ اكىمشىلىگىنە قىزىنا قاتىستى بۋللينگ جايىندا بىرنەشە رەت شاعىمدانعان. الايدا، اكەنىڭ سوزىنشە، ءبىلىم ورداسى تاراپىنان ناقتى شارا قابىلدانباعان. ەر ادام سىنىپتاستارى بالانى مازاقتاپ، پسيحولوگيالىق قىسىم كورسەتكەنىن، ال مۇعالىمدەر بۇل جاعدايعا ءتيىستى دەڭگەيدە ارالاسپاعانىن ايتادى.
وقيعادان كەيىن مەكتەپكە كەلگەن اكە وقۋ ورنى باسشىلىعىنان سالقىن ءارى فورمالدى قاتىناس كورگەنىن جەتكىزدى. ونىڭ ايتۋىنشا، مەكتەپ ديرەكتورى ميسس ماحون جاعدايدىڭ اۋىرلىعىن تولىق تۇسىنبەگەندەي اسەر قالدىرعان.
«مەنى تومەندەتكەندەي، جوعارىدان قارادى. مەكتەپ قابىرعاسىندا بالا ءولىم اۋزىندا جاتىر، ال ولاردىڭ جاۋابى: “سىزدەردىڭ ەلدەرىڭىزدە سۋيسيد كوپ قوي، ءبىز نە ىستەي الامىز؟” دەگەنگە سايادى. بۇل جىلىنا 25 مىڭ دوللار تۇراتىن مەكتەپتىڭ “قامقورلىعى” ما؟» – دەپ جازدى ول الەۋمەتتىك جەلىدەگى جازباسىندا.
سونىمەن قاتار، اكەسى بۋللينگكە قاتىسقان وقۋشىلاردىڭ ءبىرى جوعارى لاۋازىمدى شەنەۋنىكتىڭ قىزى بولۋى مۇمكىن ەكەنىن دە مەڭزەدى.
اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى جاعدايدىڭ باقىلاۋعا الىنعانىن حابارلادى. مەكتەپكە ءموبيلدى پسيحولوگيالىق كومەك توبى جىبەرىلىپ، زارداپ شەككەن بالاعا جەكە قولداۋ ۇيىمداستىرىلادى. وقۋ ورنىنا پروفيلاكتيكالىق جۇمىس جۇرگىزۋ ۇسىنىلعان.
الماتى قالالىق پوليسيا دەپارتامەنتى بۋللينگ فاكتىسى بويىنشا قىلمىستىق ءىس قوزعالعانىن مالىمدەدى. تەرگەۋ امالدارى باستالدى.
