«Bulai bolmaidy!». Bozymbaev biýdjet qarjysyn durys igermegen ákimderdi synady
Oblystyq qarjy basqarmasynyń basshysy Jasulan Estenov osy taqyrypqa bailanysty qazirgi jaǵdai týraly baiandady. Onyń aitýynsha, oblys boiynsha 2022 jyldyń 1 qańtaryna jospar 816,9 mlrd. teńgeni quraidy, biýdjettiń boljamdy oryndalý jospary – 98%.
Negizgi baiandamashynyń sózinen keiin oblys ákimi Qanat Bozymbaev munan soń biýdjettiń igerilmeý kórsetkishteri joǵary bolyp otyrǵan birqatar basqarmalardyń basshylaryn, aýdan, qala ákimderin tyńdady. Olardyń qatarynda qurylys, kásipkerlik jáne indýstrialdy-innovatsiialyq damý, bilim, aýyl sharýashylyǵy basqarmalarynyń basshylary, sol siiaqty Alakól, Eskeldi, Kegen, Qarasai aýdandary men Taldyqorǵan qalasynyń ákimderi bar.
Oblys ákimi Qanat Bozymbaev qalyptasqan jaǵdaidyń basty sebebi jumystyń tiimdi uiymdastyrylmaýy ekenin eske salyp, olardyń jumysyn qatań synǵa aldy.
Jiyn barysynda jaǵdaidy jaqsartýǵa baǵyttalǵan birqatar sharalardy qolǵa alý mindetteri júkteldi. Atap aitqanda, biýdjettik baǵdarlama ákimshilerine, aýdan, qala ákimderine ekonomika basqarmasymen birlesip qaita bólýge jatatyn jergilikti biýdjettiń shyǵystary boiynsha jumysty pysyqtaýdy, qoldanystaǵy zańnama sheńberinde Ulttyq qordan bólingen biýdjet qarajatyn barynsha igerý sharalaryn qabyldaýdy tapsyrdy.
– Keibir oblystar respýblikalyq biýdjetten jetkilikti kólemde qarjy ala almai jatady, al sizder barlyq múmkindik jasalyp otyrǵanda igermeýge jol berip otyrsyzdar. Bulai bolmaidy! Jumysty durys uiymdastyra almaý osyndai saldarǵa ákep soqtyryp otyr. Sondyqtan tez arada bir aptanyń ishinde jergilikti biýdjet qarjysyn qaita bólýdiń tiimdi sharalaryn qabyldaý kerek. Ulttyq qordan bólingen qarjyny sapaly igerýge barynsha qol jetkizýge tiispiz. Qurylys nysandaryndaǵy jumystyń kesheýildeýine jol bergen yqylassyz merdiger uiymdardy «qara tizimge» engizip, kelesi jylǵy jobalarǵa qatysýyna jol bermeý kerek! Alys óńirlerden keletin merdigerlerdiń ornyna barlyq qajetti materialdyq-tehnikalyq bazasy bar jergilikti uiymdarǵa kóbirek kóńil bólińizder. Oblystyq ekonomika jáne biýdjettik josparlaý basqarmasynyń basshysyna jergilikti biýdjet qarajatyn bólý jumystaryn qaita qaraýdy, qarjyny joǵary deńgeide daiynǵy bar naqty jobalarǵa ǵana bólýdi tapsyramyn. Orynbasarlarym ózderi jetekshilik etetin salalar boiynsha biýdjettiń oryndalýyn jeke baqylaýlaryna alsyn. Shart jasasý jumystaryn aiaqtaýǵa 20 kún qaldy. Sondyqtan bul baǵyttaǵy jumysty shiratý kerek, – dedi Qanat Bozymbaev.
