Qazaqstanda ajyrasqandarǵa salyq salý týraly usynys qoǵamda qyzý pikirtalas týdyrdy. Belgili til mamany Nazgúl Qojabek bul bastamanyń túp-tórkinine úńilip, onyń artynda áielderdiń qoǵamdaǵy mártebesine qatysty tereń áleýmettik kózqaras jatqanyn alǵa tartty, dep habarlaidy Dalanews.kz.
"Ajyrasqandarǵa salyq salynsyn" degen "ideianyń" artynda ne turǵanyn aitaiyn ba?
Qazaqta "otaǵasy" degen nárse bar. Onyń orysshasy — glava semi. Vot, bala-shaǵasyn ózi baǵyp otyrǵan áiel avtomat túrde úiiniń BASY, BASShYSY, toqeteri - OTAǴASY bolyp shyǵa keledi. Óitkeni bala-shaǵanyń búgini men erteńi, densaýlyǵy men qaýipsizdigi, qaida turyp, ne iship-jeitini, ne kiip, qalai júrip-turatyny sonyń jaýapkershiliginde. Otaǵasy degen — osyǵan jaýap beretin adam”, — deidi ol.
Mamannyń aitýynsha, qazirgi tańda Qazaqstanda 400 myńnan astam áiel “otaǵasy” rólin atqaryp júr. Biraq qoǵamda muny qabyldai almaityndar bar.
“Bul kisiler áieldiń óitip, dál osyndai jolmen bolsa da, erkekterge teńeskenin kótere almaidy. Kótere almaidy. Sodan, áieldiń óitip shyǵandap ketýine jol bermei, adymyn ashtyrmaityn amal izdeý kerek.
Bular bar ǵoi, bar otbasylardyń tynyshtyǵyn, berekesin oilap otyrǵan joq. Bulardyń kózine kúiik — ajyrasqan qatyn. Qoǵamnyń bar ittiginiń aiybyn solardyń (BIZDIŃ!) moinyna artyp qoimaq.
Óle qalyńdar, biz óz úiimizdiń otaǵasymyz!” — dep jazdy ol.
Nazgúl Qojabektiń pikirinshe, eger parlament “Otaǵasynyń mártebesi týraly” zańdy qabyldasa, onda áielderdiń de osy mártebege ie bolýyn zańmen bekitý qajet.
“Qaibir jyly parlamentte aitylyp qalǵan "Otaǵasynyń mártebesi týraly" zań, iaǵni "Zakon o statýse glavy semi" jazyla qalsa, ol zańda bizdiń de mártebemiz aitylady degen sóz” — dep qosty ol.
Aita keteiik, buǵan deiin depýtattar tarapynan ajyrasqan azamattarǵa arnaiy salyq salý týraly usynys aitylǵan edi.
