Úkimet otyrysynda premer-ministr Oljas Bektenov saýda jelileriniń ielerine eskertý jasady, dep habarlaidy dalanews.kz.
Ol otandyq taýarlardan buryn importtyq ónimge basymdyq berýge jol berilmeitinin aitty.
"Halyq tutynatyn taýarlardy shyǵaratyn otandyq óndirýshiler kóp jaǵdaida saýda alańdaryna qol jetkize almaidy, onyń ishinde jaldaý aqysy joǵary bolýyna bailanysty qiyndyqtar da bar. Bul ishki naryqta qazaqstandyq ónimniń úlesin keńeitýge kedergi keltirip, onyń básekege qabilettiligin tómendetedi. Saýda jelileriniń ieleri qazaqstandyq taýarlarǵa degen kózqarasyn túbegeili ózgertýge tiis dep sanaimyn. Otandyq ónimnen buryn importtyq taýarlarǵa basymdyq berý quqyqtyq jaǵynan ǵana emes, moraldyq turǵydan da durys emes", - dep atap ótti Oljas Bektenov.
Saýda ministrligine múddeli memlekettik organdarmen, óńir ákimdikterimen jáne "Atameken" palatasymen birlesip, taýarlardyń barlyq sanatyn, sonyń ishinde jeńil ónerkásip pen turmystyq himiia ónimderin shyǵaratyn otandyq óndirýshilerge saýda alańdaryn jalǵa alýdyń qolaily sharttaryn usynýdyń naqty tetikterin ázirleý tapsyryldy.
Sonymen qatar, premer-ministr qazaqstandyq óndirýshilerdi negizsiz aqparattyq shabýyldan qorǵaý qajettigin atap ótti.
"Qazaqstanda óndiriletin tanymal taýarlardy, azyq-túlik jáne konditerlik ónimderdi qaralaý úshin ádeii uiymdastyrylǵan aqparattyq naýqandar baiqalady. Munyń barlyǵynyń kózdegen maqsaty bir: básekelesterdi naryqtan yǵystyryp, olardyń ornyn iemdenip qalý. Mádeniet jáne aqparat ministrligi múddeli memlekettik organdarmen birlesip, "Qazaqstanda jasalǵan" ulttyq brendin ilgeriletýge, otandyq taýarlardy keńinen dáripteýge jáne olardy negizsiz aqparattyq shabýyldardan qorǵaýǵa baǵyttalǵan biryńǵai aqparattyq naýqan júrgizilýin qamtamasyz etsin", - dep atap ótti premer-ministr.
