Saltanat Núkenovanyń aǵasy Aitbek Amangeldi tikelei efirde eki kún boiy ótken sot otyrystaryna qatysty pikir bildirdi, - dep habarlaidy Dalanews.kz.
Aitbek Amangeldiniń sózinshe, bul iske qatysty tergeý sapaly ári eshqandai zań buzýsyz ótken.
"Kóp adam alqa biler sotyna qatysty narazy bolyp jatqanyn bilemin. Biraq oǵan eshkim qarsy shyǵa almaidy, sebebi bul onyń (Bishimbaevtyń) konstitýtsiialyq quqyǵy", - deidi Aitbek Amangeldi.
Aitbek Amangeldi sot otyrysy ótken eki kún streske toly bolǵanyn aitady.
"Shynymdy aitsam, qobaljydym. Tipti maǵan sóz bergen kezde de qobaljydym, bul sot otyrysy ǵoi, buǵan deiin ondai nársege tap bolmadym. Búgin qatty ýaiymdadym. Sýdia sheshim shyǵarǵan kezde de alaburtyp otyrdym. Sebebi bul eń aldymen ádil sheshim boldy. Sebebi olar tergeý materialdarynan videolardy, sýretterdi, hattardy alyp tastaý arqyly isti qurdymǵa ketirmek boldy. Birinshi kúni otyrysta jai ǵana bapty aita salýǵa bolatyn edi, onyń ornyna olar birneshe saǵat boiy ár bapty oqyp, artynan ekinshi aiyptalýshy oryssha jaqsy túsinse de ony qazaq tiline aýdaryp otyrdy. Arnaiy qazaq tiline aýdaryp jatqan kezde ekinshi aiyptalýshy uiyqtap ta ketken. Bári eki saǵatta ótip ketýdiń ornyna eki kúnge sozylyp ketti.
Tipti ne aitarymdy da bilmeimin. Bul tek basy ǵana, bizge bosańsýǵa bolmaidy. Alda áli basty sot otyrysy bar", - deidi Aitbek Amangeldi.
Aita keteiik, eks-ministr Bishimbaevqa áielin asa qatygezdikpen óltirdi degen aiyp taǵylyp otyr. Oqiǵa Astanadaǵy meiramhanalardyń birinde bolǵan edi.
Bul is boiynsha basty sot otyrysy 27 naýryzǵa josparlanyp otyr.
Byltyr 9 qarashada Qýandyq Bishimbaev ustalǵany belgili boldy. Al 11 qarashada burynǵy ministr qamaýǵa alyndy.
Keshe, 11 naýryzda aldyn ala tyńdaý barysynda memlekettik aiyptaýshy sumdyq jaittardy aitqany habarlandy.
