Sarapshy pikirinshe baǵdarlamadaǵy shikilikter «Otbasy bankiniń» ipotekany jeńildikpen beretin shynaiy qarjy institýtyna ainalýyna kedergi keltirýde.
«Maǵan Turǵyn-úi qurylys jinaq bankin basqaryp otyrǵan ujymnyń iskerligi unaidy. Olar óz tarapynan bank jumysyn jaqsartýda qolynan kelgendi isteýde. Alaida banktiń qabyrǵasy qalanǵan ýaqytta ázirlengen ipotelik baǵdarlamalardyń kemshiligi kóp. Týrasyn aitqanda bul jobalar qarjy uiymynyń áleýmettik baǵytty ustanǵan pozitsiiasy men turǵyn-úi saiasatyna sai emes.
Páter alýshyǵa jeńildikpen berilgendei kórinetin bank ipotekasynyń paiyzy shyn máninde naryqtaǵy baǵadan da joǵary», – deidi Qudaibergenov.
Onyń aitýynsha bank kredit bermes buryn aldyn-ala tólem retinde baspana baǵasynyń 50 paiyzyn shotqa jinaýdy talap etedi. Alaida qaryzdy osy somanyń ústinen tutas rásimdeidi. Bylaisha aitqanda salymshynyń mańdai termen tapqan qarajatyn ózine qaryz retinde beredi.
«Osynyń kesirinen jeńildikpen berilgendei kórinetin 7 paiyz shyn máninde 14 paiyzǵa ósip shyǵa keledi. Bul ekinshi deńgeili bankterdiń paiyzdyq mólsherlemesinen asyp túsedi», – deidi ekonomist.
Qudaibergenovtiń atap ótkenindei Turǵyn-úi jinaq bankindegi paiyzdyq mólsherme bank tarapynan berilgen naqty nesieniń negizinde rásimdelýi tiis. Salymshynyń salǵan aqshasy bul sanatqa kirmeýi kerek.
«Otbasy bankindegi esep-shotyn udaiy tolyqtyryp otyratyn salymshylar syiaqy alady. Alaida mundai múmkindigi joq nemese osy bankten shot ashpaǵan azamattardy mólsherlemesi joǵary kreditpen «jazalaý» qatelik. Banktiń negizgi nesieleý mólsherlemesi 7 paiyzdaý aspaýy kerek.
Tutastai alǵanda turǵyn-úi depoziti men nesieleý saiasaty Úkimettiń osy baǵyttaǵy jumysty ádil úlestirgenin kórsetýge tiis edi. Jeke institýt munyń esebinen tabys tabýǵa mindetti emes», – deidi ekonomist.
