Jaqynda AQSh prezidenti Donald Tramptyń ákimshiligi RFE/RL("Azattyq Eýropa Radiosy/Azattyq radiosy") jelilerin qarjylandyrýdy tolyqtai toqtatty. Osyǵan bailanysty jeliniń birneshe eldegi bólimshesi jabylyp qalý qaýpi týyndady. Aita keteiik, jeliniń Qazaqstandaǵy bólimshesi de bar. "Azattyq" tóńiregindegi máselege májilis depýtaty Erlan Sairov pikir bildirdi, dep habarlaidy Dalanews.kz.
Májilis depýtaty Erlan Sairov "Azattyq radiosy" - Qazaqstannyń táýelsiz jýrnalistikasynyń mektebi ekenin atap ótti.
"Paradoks bolýy múmkin. Qazaqstandaǵy áleýmettik, ekonomikalyq, saiasi problemalardy aita otyryp, sony mádenietti túrde jetkizýdiń úlgisi dep aitýǵa bolady. Sonymen qatar, "Azattyq radiosynan" qazaqtyń kóptegen jas jýrnalisi ushtalyp, ártúrli salada qyzmet etip júr. Sondyqtan "Azattyq radiosy" erkin jýrnalistikanyń, sonymen qatar, memlekettik oilaý deńgeiin qalyptastyratyn áser etip jatqan institýt dep sanaimyn", deidi depýtat Dalanews.kz-ke.
Tramp buǵan deiin biýrokratiiamen kúresý maqsatynda birneshe vedomstvonyń jumysyn jáne qyzmetkerler sanyn barynsha qysqartýǵa qatysty jarlyqqa qol qoiǵan. Olardyń qatarynda RFE/RL (“Azat Eýropa/Azattyq radiosy”) men “Amerika Daýysyn” baqylaityn AQSh-tyń Jahandyq media agenttigi (USAGM) de bar.
AQSh basshysynyń sheshimine sáikes, keibir memlekettik uiymdar amerikalyq zańnamada belgilengen eń az deńgeige deiin óz qyzmeti men qyzmetkerler sanyn qysqartýǵa mindetti. ABC telearnasynyń málimetinshe, “Amerika Daýysynyń” amerikalyq qyzmetkerleri Tramp birneshe vedomstvonyń, sonyń ishinde USAGM jumysynyń toqtatylýy týraly jarlyqqa qol qoiǵannan keiin, ákimshilik demalysqa májbúrli túrde jiberiletini jóninde habarlama ala bastaǵan.
RFE/RL direktory jáne prezidenti Stiven Kapýstyń aitýynsha, medianyń qarjylandyrýynyń toqtatylýyna bailanysty jabylýy “AQSh-tyń jaýlaryna jasalǵan syi” bolmaq.
"RFE/RL (“Azat Eýropa/Azattyq radiosy”) granttyq kelisiminiń toqtatylýy Amerikanyń qarsylastary úshin úlken jeńis boldy. Irandyq aiatollalar, Qytaidyń kommýnistik kóshbasshylary, Máskeý men Minsktegi avtokrattar 75 jyl ótken soń “Azat Eýropa/Azattyq radiosynyń” jabylýyn atap ótýde. Bul qadam qarsylastardy kúsheitip, Amerikany álsiretedi", dedi Kapýs.
Azattyq radiosy 1950 jyly qurylyp, sóz bostandyǵy shektelgen elderde jańalyqtar tarata bastaǵan. 2025 jylǵy naýryzdaǵy málimet boiynsha, radioda myńdaǵan qyzmetker jumys istegen.
