جاقىندا اقش پرەزيدەنتى دونالد ترامپتىڭ اكىمشىلىگى RFE/RL("ازاتتىق ەۋروپا راديوسى/ازاتتىق راديوسى") جەلىلەرىن قارجىلاندىرۋدى تولىقتاي توقتاتتى. وسىعان بايلانىستى جەلىنىڭ بىرنەشە ەلدەگى بولىمشەسى جابىلىپ قالۋ ءقاۋپى تۋىندادى. ايتا كەتەيىك، جەلىنىڭ قازاقستانداعى بولىمشەسى دە بار. "ازاتتىق" توڭىرەگىندەگى ماسەلەگە ءماجىلىس دەپۋتاتى ەرلان سايروۆ پىكىر ءبىلدىردى، دەپ حابارلايدى Dalanews.kz.
ءماجىلىس دەپۋتاتى ەرلان سايروۆ "ازاتتىق راديوسى" - قازاقستاننىڭ تاۋەلسىز جۋرناليستيكاسىنىڭ مەكتەبى ەكەنىن اتاپ ءوتتى.
"پارادوكس بولۋى مۇمكىن. قازاقستانداعى الەۋمەتتىك، ەكونوميكالىق، ساياسي پروبلەمالاردى ايتا وتىرىپ، سونى مادەنيەتتى تۇردە جەتكىزۋدىڭ ۇلگىسى دەپ ايتۋعا بولادى. سونىمەن قاتار، "ازاتتىق راديوسىنان" قازاقتىڭ كوپتەگەن جاس ءجۋرناليسى ۇشتالىپ، ءارتۇرلى سالادا قىزمەت ەتىپ ءجۇر. سوندىقتان "ازاتتىق راديوسى" ەركىن جۋرناليستيكانىڭ، سونىمەن قاتار، مەملەكەتتىك ويلاۋ دەڭگەيىن قالىپتاستىراتىن اسەر ەتىپ جاتقان ينستيتۋت دەپ سانايمىن"، دەيدى دەپۋتات Dalanews.kz-كە.
ترامپ بۇعان دەيىن بيۋروكراتيامەن كۇرەسۋ ماقساتىندا بىرنەشە ۆەدومستۆونىڭ جۇمىسىن جانە قىزمەتكەرلەر سانىن بارىنشا قىسقارتۋعا قاتىستى جارلىققا قول قويعان. ولاردىڭ قاتارىندا RFE/RL (“ازات ەۋروپا/ازاتتىق راديوسى”) مەن “امەريكا داۋىسىن” باقىلايتىن اقش-تىڭ جاھاندىق مەديا اگەنتتىگى (USAGM) دە بار.
اقش باسشىسىنىڭ شەشىمىنە سايكەس، كەيبىر مەملەكەتتىك ۇيىمدار امەريكالىق زاڭنامادا بەلگىلەنگەن ەڭ از دەڭگەيگە دەيىن ءوز قىزمەتى مەن قىزمەتكەرلەر سانىن قىسقارتۋعا مىندەتتى. ABC تەلەارناسىنىڭ مالىمەتىنشە، “امەريكا داۋىسىنىڭ” امەريكالىق قىزمەتكەرلەرى ترامپ بىرنەشە ۆەدومستۆونىڭ، سونىڭ ىشىندە USAGM جۇمىسىنىڭ توقتاتىلۋى تۋرالى جارلىققا قول قويعاننان كەيىن، اكىمشىلىك دەمالىسقا ءماجبۇرلى تۇردە جىبەرىلەتىنى جونىندە حابارلاما الا باستاعان.
RFE/RL ديرەكتورى جانە پرەزيدەنتى ستيۆەن كاپۋستىڭ ايتۋىنشا، مەديانىڭ قارجىلاندىرۋىنىڭ توقتاتىلۋىنا بايلانىستى جابىلۋى “اقش-تىڭ جاۋلارىنا جاسالعان سىي” بولماق.
"RFE/RL (“ازات ەۋروپا/ازاتتىق راديوسى”) گرانتتىق كەلىسىمىنىڭ توقتاتىلۋى امەريكانىڭ قارسىلاستارى ءۇشىن ۇلكەن جەڭىس بولدى. يراندىق اياتوللالار، قىتايدىڭ كوممۋنيستىك كوشباسشىلارى، ماسكەۋ مەن مينسكتەگى اۆتوكراتتار 75 جىل وتكەن سوڭ “ازات ەۋروپا/ازاتتىق راديوسىنىڭ” جابىلۋىن اتاپ وتۋدە. بۇل قادام قارسىلاستاردى كۇشەيتىپ، امەريكانى السىرەتەدى"، دەدى كاپۋس.
ازاتتىق راديوسى 1950 جىلى قۇرىلىپ، ءسوز بوستاندىعى شەكتەلگەن ەلدەردە جاڭالىقتار تاراتا باستاعان. 2025 جىلعى ناۋرىزداعى مالىمەت بويىنشا، راديودا مىڭداعان قىزمەتكەر جۇمىس ىستەگەن.
