Prezident Qasym-Jomart Toqaev BAQ salasy qyzmetkerlerin marapattaý rásiminde jemqorlyq máselesine erekshe toqtaldy, - dep habarlaidy Dalanews.kz.
"Biz ár salada zań ústemdigin qamtamasyz etý úshin naqty sharalar qabyldap jatyrmyz. Qazaqstan – quqyqtyq memleket. Al kez kelgen quqyqtyq memlekette azamattar men institýttardyń barlyǵy zańdardy, erejeler men normalardy múltiksiz saqtaýǵa tiis. Qoǵamdaǵy qarama-qaishylyqtar men kelispeýshilikter ulttyq zańnamaǵa jáne negizgi halyqaralyq normalarǵa sáikes sheshilýi kerek. Bul – men úshin myzǵymas ustanym. Sonda ǵana biz berekeli jáne ádiletti qoǵam quramyz. Sondyqtan Zań men tártip qaǵidatyn barshaǵa jáne árbir adamǵa birdei múmkindik beretin Ádiletti Qazaqstandy qurý úshin berik irgetas dep qaraǵan jón.
Biz, eń aldymen, jemqorlyqty túbirimen joiýymyz kerek. Men osy máselege airyqsha mán beremin. Biz qoǵamda bul keseldiń bar ekenin jasyrmaimyz. Ashyq aitamyz dep, onyń zardabyn da tartyp jatamyz. Tipti, keide sheteldikter de, óz azamattarymyz da Qazaqstandy jemqorlyqqa belshesinen batqan el dep oilaidy. Bul shyndyqqa esh janaspaidy. El múddesi úshin eńbek etip júrgen adal azamattar az emes. Qaitalap aitamyn: jemqorlyq – kesel. Biz tutas qoǵam bolyp oǵan qarsy turýymyz kerek. Sonda ǵana nátije bolady", - dedi Memleket basshysy.
