Májilis depýtaty Dáýlet Muqaev “Ashyq alań” baǵdarlamasynda jáne óziniń Instagram paraqshasynda meshitterdegi as berý rásimderiniń qymbatshylyǵyn synap, bul máseleni sheshý qajettigin kóterdi, dep habarlaidy Dalanews.kz.
“Astanadaǵy Bas meshit pen Haziret Sultan meshitindegi ashanada as berýdi josparlasańyz, adam basyna 20 000 teńgege deiin tóleýge daiyn bolyńyz. Bul – toi dastarqanyna bergisiz as máziri! Eń tómengi baǵa 7 000 teńgeden bastalady, biraq ol kezde etti ózińiz ákelýińiz kerek. Bul biznes bolmaǵanda ne? Máselen, Shyǵys Qazaqstan, Abai, Pavlodar oblystarynda dastarqanǵa tek 7 túrli as qoiylady, basqa taǵam usynylmaidy. Nege elordada jáne basqa aimaqtarda osy júie engizilmeidi?” – dedi ol.
Depýtat halyq arasynda oryn alyp otyrǵan ysyrapshyldyq máselesine toqtalyp, ony retteýdi aldymen meshitterden bastaý qajet ekenin atap ótti.
“Erte me, kesh pe, ár adam ólimniń dámin tatady. Bul – eshkim ainalyp óte almaityn jaǵdai. Jer alý, janaza shyǵarý, as berý, zirat turǵyzý – munyń bári belgili bir qarjylai shyǵyndardy talap etedi. Biraq bul rásimder ásirese qarapaiym halyqqa aýyrtpalyq túsirmeýi tiis. Eger Qazaqstan Musylmandary Dini Basqarmasy bul máseleni júieli túrde sheshpese, qaiǵydan qan jutyp otyrǵan jandar úshin bul qosymsha soqqy bolmaq,” – dep jazdy depýtat.
Onyń aitýynsha, qoǵamdaǵy ysyrapshyldyqty joiý úshin eń aldymen meshitterden bastaý qajet.
