"Eki-úsh kúnnen beri ekinshi ret ainalyp soqqan derttiń áýresimen em alyp jatyrmyz. Júldegerlerdi qarsy alyp aeroportta júrdik, jumysqa bardyq, dámhanada boldyq, qaidan derińiz bar ma, Jaratqannyń jazýymen jurt júrgen jerde juǵysyp qalsaq kerek”, – dep jazdy Tazabek Instagram-daǵy paraqshasynda.
Alty ai buryn vaktsina alǵan Muhammedjan Tazabek bul joly aýrýdy jeńil ótkerip jatqanyn atap ótti.
Onyń paiymynsha, álemdi dúrbeleńge salǵan virýstyń syry biz oilaǵannan tereńde jatyr.
“Ár nárse – Qudaidan” deimiz ǵoi. Biraq sonyń parqyna tereń boilai bermeitin sekildimiz.
Aqylǵa salamyz dep, asyra silteimiz. Allaǵa táýekel etemiz dep tártipti umytyp jatamyz.
Qundylyqtardy qurdymǵa iterip, adamshylyqtan attap, azǵyndyqty ashyq nasihattap, zulymdyq pen qiianattyń nebir túrin jasap jatqan adamzatqa Allanyń sońǵy bir eskertýleri kelip jatqandai, ári-beriden soń jaqsylardy jalmap, tulǵalardan jalańashtap jatqan synaq-sabaq-azap ekenine kózim tolyq jete bastaǵandai.
Talai tumaý kórdik, talai sýyq tidi. Biraq, bir zańdylyqtardyń sheńberinde júzege asyp jatatyn. Myqtylar saý qap, álsizder á degennen murttai ushatyn.
Bul virýstyń úlken bir sipaty - adam tańdamaitynynda.
Súlderin súiretip júrgenderdi ainalyp ótip, attai azamattardy alyp uryp jatyr. Sozylmaly derti bardy da, tepse temir úzetin tegeýrindini de aiap jatqan joq.
Osy aýyrý bastalǵaly tóńiregimdegi eki adamǵa qatty alańdadym. Aldymen ketip qalardai ýaiymdadym. Ekeýi de jas emes, densaýlyqtary múldem joq, el aman, jurt tynyshta ne bop qalar eken dep, eleńdetip, esimizdi shyǵaryp júrgen jaqyndarymyz.
Taǵdyr ǵoi, byltyrdan beri úi ishindegileriniń bári aýyrdy. Allaǵa shúkir, bir bólmede as iship, bir tósekte jatqan álgi dimkas týysqandaryma dym bolǵan joq. Alla olardy aqyryna deiin berekesine bólesin!
Odan beri oilamaǵan jerden úsh uiyqtasaq túsimizge kirmeitin nebir densaýlyǵy jylandai jigitter júrip ketip jatyr.
Qudaidyń qudireti degen osy!
Bul saqtanbaý kerek degen sóz emes. Aman júrýdiń bir syry - saqtyqta!" - dep jazba qaldyrdy qoǵam belsendisi.
