"ەكى-ۇش كۇننەن بەرى ەكىنشى رەت اينالىپ سوققان دەرتتىڭ اۋرەسىمەن ەم الىپ جاتىرمىز. جۇلدەگەرلەردى قارسى الىپ اەروپورتتا جۇردىك، جۇمىسقا باردىق، ءدامحانادا بولدىق، قايدان دەرىڭىز بار ما، جاراتقاننىڭ جازۋىمەن جۇرت جۇرگەن جەردە جۇعىسىپ قالساق كەرەك”، – دەپ جازدى تازابەك Instagram-داعى پاراقشاسىندا.
التى اي بۇرىن ۆاكسينا العان مۇحاممەدجان تازابەك بۇل جولى اۋرۋدى جەڭىل وتكەرىپ جاتقانىن اتاپ ءوتتى.
ونىڭ پايىمىنشا، الەمدى دۇربەلەڭگە سالعان ۆيرۋستىڭ سىرى ءبىز ويلاعاننان تەرەڭدە جاتىر.
“ءار نارسە – قۇدايدان” دەيمىز عوي. ءبىراق سونىڭ پارقىنا تەرەڭ بويلاي بەرمەيتىن سەكىلدىمىز.
اقىلعا سالامىز دەپ، اسىرا سىلتەيمىز. اللاعا تاۋەكەل ەتەمىز دەپ ءتارتىپتى ۇمىتىپ جاتامىز.
قۇندىلىقتاردى قۇردىمعا يتەرىپ، ادامشىلىقتان اتتاپ، ازعىندىقتى اشىق ناسيحاتتاپ، زۇلىمدىق پەن قياناتتىڭ نەبىر ءتۇرىن جاساپ جاتقان ادامزاتقا اللانىڭ سوڭعى ءبىر ەسكەرتۋلەرى كەلىپ جاتقانداي، ارى-بەرىدەن سوڭ جاقسىلاردى جالماپ، تۇلعالاردان جالاڭاشتاپ جاتقان سىناق-ساباق-ازاپ ەكەنىنە كوزىم تولىق جەتە باستاعانداي.
تالاي تۇماۋ كوردىك، تالاي سۋىق ءتيدى. ءبىراق، ءبىر زاڭدىلىقتاردىڭ شەڭبەرىندە جۇزەگە اسىپ جاتاتىن. مىقتىلار ساۋ قاپ، السىزدەر ءا دەگەننەن مۇرتتاي ۇشاتىن.
بۇل ۆيرۋستىڭ ۇلكەن ءبىر سيپاتى - ادام تاڭدامايتىنىندا.
سۇلدەرىن سۇيرەتىپ جۇرگەندەردى اينالىپ ءوتىپ، اتتاي ازاماتتاردى الىپ ۇرىپ جاتىر. سوزىلمالى دەرتى باردى دا، تەپسە تەمىر ۇزەتىن تەگەۋرىندىنى دە اياپ جاتقان جوق.
وسى اۋىرۋ باستالعالى توڭىرەگىمدەگى ەكى ادامعا قاتتى الاڭدادىم. الدىمەن كەتىپ قالارداي ۋايىمدادىم. ەكەۋى دە جاس ەمەس، دەنساۋلىقتارى مۇلدەم جوق، ەل امان، جۇرت تىنىشتا نە بوپ قالار ەكەن دەپ، ەلەڭدەتىپ، ەسىمىزدى شىعارىپ جۇرگەن جاقىندارىمىز.
تاعدىر عوي، بىلتىردان بەرى ءۇي ىشىندەگىلەرىنىڭ ءبارى اۋىردى. اللاعا شۇكىر، ءبىر بولمەدە اس ءىشىپ، ءبىر توسەكتە جاتقان الگى دىمكاس تۋىسقاندارىما دىم بولعان جوق. اللا ولاردى اقىرىنا دەيىن بەرەكەسىنە بولەسىن!
ودان بەرى ويلاماعان جەردەن ءۇش ۇيىقتاساق تۇسىمىزگە كىرمەيتىن نەبىر دەنساۋلىعى جىلانداي جىگىتتەر ءجۇرىپ كەتىپ جاتىر.
قۇدايدىڭ قۇدىرەتى دەگەن وسى!
بۇل ساقتانباۋ كەرەك دەگەن ءسوز ەمەس. امان ءجۇرۋدىڭ ءبىر سىرى - ساقتىقتا!" - دەپ جازبا قالدىردى قوعام بەلسەندىسى.
