– Bul mekenniń damý potensıaly joǵary. Qasynda temirjol stansasy bar, oblys ortalyǵyna jaqyn ornalasqan. Jańa mektepke turǵyndardyń dán rıza bolǵanyn baıqadyq. Mektep – mańyzdy ınfraqurylymdyq nysan. Onyń arqasynda jas mamandardy, otbasylardy tartyp, aýylǵa jan bitirýge bolady. Bul – eldimekenniń damýyna tyń serpin bolary da anyq, – dedi oblys ákimi.
Sonymen qatar ol Qosqudyqta mektep salýdy qolǵa alǵan Dáýren Aldabergenge, «Halyq ıgiligi» qoǵamdyq qoryna alǵysyn aıtty.
Ákim alǵys aıtqan Dáýren Aldabergen oblystyń burynǵy ákimi Qanat Bozymbaevtyń balasy.
Dáýren Aldabergen dostarymen birigip, 750 mıllıon teńgege 100 oryndyq mektep salypty. Onymen shektelmeı mektepke qajetti zamanaýı oqý qural jabdyqtaryn alyp bergen.
Máselen, jańa mektepte 24 oqý kabıneti, 2 sheberhana, kompúterlik synyp, 3 arnaıy kabınet (fızıka, hımıa, bıologıa), 3 ınteraktıvti taqta, akt jáne sport zaldary, 60 oryndyq ashana, oqý zaly bar kitaphana, medısınalyq kabınet bar.
Mektepte 20 muǵalim qyzmet etedi. Qajetke jarar dep jańa kólik te syılady.
– Búgin ózim úshin, bala-shaǵam úshin erekshe kún. Osy ýaqytqa deıin qanshama mekteptiń salynýyna qatysyp, úles qosyp júrsem de, búgingideı tolqyǵan emespin. Óıtkeni ákem Aldabergen ósken osy aýylda myna jańa mektepti ulym Dáýren men onyń dostary salyp berip, kóńilimdi kókke kóterip tur. Olar «Halyq ıgiligi» qoǵamdyq qoryn quryp, óz kúshterimen osy ǵımaratty salyp shyqty, – dedi Qanat Bozymbaev el aldynda.
Qosqudyqtaǵy burynǵy mektep 1952 jyly salynǵandyqtan eskirip, tozǵan soń turǵyndar Qanat Bozymbaevqa ákim kezinde mektep salyp berýge ótinish aıtqan.
– Ákim retinde osy aýylǵa kelgenimde birinshi jaıylym jerdiń, ekinshi medısınalyq pýnkt pen mekteptiń máselesi shyqty. Jaıylym jerdi turǵyndarǵa qaıtartyp bergizdik. Medısınalyq pýnkt te sheshildi.
Al mektepti búdjet esebinen salýǵa ýaqyt kerek boldy. Onyń ústine búdjette birinshi úlken aýyldarǵa basymdyq beriledi. Osyny estigen balam qaıyrymdylyq qoryn quryp, dostarymen bir jyldyń ishinde salyp berdi.
Sóıtip, elge bergen ýádemdi oryndap, meni de, aýyl turǵyndaryn da qýantty. Jalpy, Qosqudyq temir jol boıyndaǵy stansıa bolǵandyqtan únemi jumys bolady.
Sosyn, bul aýylda kirpish zaýyty bar. Jaqyn arada Qonaev qalasynda qurylys qyzý júre bastaıdy. Áleýmettik ınfraqurylymdy jańartý ǵana qaldy. Jańa mekteppen bul aýyldyń jańa dáýiri bastalady, – dedi Qanat Bozymbaev.
Sondaı-aq ol balasynyń «Halyq ıgiligi» qoǵamdyq qory elde búdjet kezige jetpeı jatqan máselelerdi sheshýge aldaǵy ýaqytta da kómektesetinine senim bildirdi.
Jalpy, Almaty oblysynda 456 mektep bolsa, onda 330 myńnan astam oqýshy bilim alady. Oblysta úsh aýysymdy oqý máselesin joıý ózekti máseleniń biri.
