«Qazgıdromet» RMK málimetinshe, 26 jeltoqsanda Qazaqstan aýmaǵynda aýa raıy ártúrli bolmaq. Eldiń basym bóliginde aıaz saqtalyp, birqatar óńirde jel kúsheıedi, dep habarlaıdy Dalanews.kz.
Soltústik jáne ortalyq aımaqtarda qatty sýyq kútiledi. Astanada kúndiz aýa temperatýrasy –18…–20 gradýsqa deıin tómendep, túnde odan ári sýytady. Jeldiń jyldamdyǵy 9–14 m/s, túnde ekpini 15–20 m/s-qa deıin jetýi múmkin. Kókshetaýda –22…–24, Qostanaıda –18…–20, Petropavlda –20…–22 gradýs aıaz boljanyp otyr.
Qaraǵandy, Pavlodar jáne Jezqazǵan qalalarynda kúndiz –10…–15 gradýs shamasynda bolyp, temperatýranyń odan ári tómendeýi kútiledi. Jeldiń jyldamdyǵy 9–14 m/s, keı jerlerde ekpini 15–20 m/s-qa deıin kúsheıedi.
Batys óńirlerde salystyrmaly túrde jyly aýa raıy baıqalady. Aqtaýda aýa temperatýrasy 0…–2 gradýs bolsa, Oralda –6…–8, Atyraýda –3…–5 gradýs shamasynda bolady. Jeldiń jyldamdyǵy 5–14 m/s.
Ońtústik jáne ońtústik-shyǵysta kún jylylaý. Almatyda +3…+5, Taldyqorǵanda +2…+4, Taraz ben Shymkentte +1…+3 gradýs kútiledi. Alaıda bul óńirlerde de jel kúsheıip, keı jerlerde ekpini 20–28 m/s-qa deıin jetýi múmkin.
Al Semeı men Óskemende aýa temperatýrasy –2…+1 gradýs aralyǵynda bolady. Jeldiń ekpini kúndiz 20–23 m/s-qa deıin kúsheıýi yqtımal.
Sınoptıkter turǵyndardy aýa raıynyń qolaısyzdyǵyna baılanysty saqtyq sharalaryn ustanýǵa shaqyrady.
