Atyraý oblysynda jeke balabaqshaǵa qarapaiym kúrishtiń bir kelisin 21 myń teńgeden jetkizgen kásipker anyqtaldy. Bul týraly oblystyq Ekonomikalyq tergep-tekserý departamenti málimdedi, dep habarlaidy dalanews.kz.
Vedomstvonyń málimetinshe, kásipker áleýmettik mańyzy bar azyq-túlik ónimine 3500 paiyzdan astam saýda ústemesin qosqan. Al zań boiynsha mundai taýarlarǵa qoiylatyn eń joǵary saýda ústemesi 15 paiyzdan aspaýy tiis.
Zań buzýshylyq áleýmettik mańyzy bar azyq-túlik taýarlarynyń baǵasyna júrgizilgen tsifrlyq monitoring kezinde belgili bolǵan.
Jalpy, óńirde ruqsat etilgen mólsherden artyq saýda ústemesin qosqan onnan astam iri jetkizýshi anyqtalǵan. Alaida balabaqshaǵa kúrishtiń bir kelisin 21 myń teńgeden satqan kásipkerdiń áreketi eń óreskel jaǵdai retinde baǵalanyp otyr.
Atyraý oblystyq Ekonomikalyq tergep-tekserý departamenti basqarmasynyń basshysy Bekbolat Anesovtyń aitýynsha, bul másele oblys ákimdigi janyndaǵy arnaiy komissiianyń qaraýyna shyǵarylǵan.
Qazir kásipkerge qatysty zań aiasynda tiisti qatań sharalar qabyldaý máselesi qarastyrylyp jatyr.
