Jańa kólikter pochtamttyń kólik múmkindikterin keńeitip, poshta jóneltilimderin jetkizý jedeldigin arttyrýǵa jáne elorda turǵyndaryna, kompaniialar men uiymdarǵa kórsetiletin qyzmet sapasyn jaqsartýǵa múmkindik beredi. Avtoparkti jańartý elorda óńirindegi logistikalyq protsesterdi odan ári damytýǵa da qosymsha múmkindikter jasaidy, dep habarlaidy dalanews.kz.
«2026 jyly «Qazpochta» 206 birlik kólik quralyn satyp alýdy josparlap otyr. Zamanaýi ári senimdi avtopark – kompaniianyń operatsiialyq qyzmetiniń mańyzdy bóligi jáne logistika tiimdiligin arttyrýdyń negizgi faktorlarynyń biri. Biz bul baǵytqa erekshe mán beremiz jáne aldaǵy ýaqytta da avtoparkti jańǵyrtýǵa investitsiia salýdy jalǵastyramyz.
Sonymen qatar óndiristik protsestiń úzdiksizdigin qamtamasyz etýge baǵyttalǵan is-sharalar júrgizilýde. Olarǵa 2026 jyly shamamen 13 mlrd teńge investitsiia qarastyrylǵan. Atap aitqanda, IT-infraqurylymdy jańǵyrtý, jańartylǵan e-com platformasyn engizý, internet-banking pen Super App-ty jańartý, poshta-esep júiesin mikroservistik arhitektýraǵa kóshirý, zamanaýi POS-terminaldar men bankomattardy satyp alý, sondai-aq ǵimarattarǵa kúrdeli jóndeý jumystaryn júrgizý josparlanýda», – dedi «Qazpochta» AQ Basqarma tóraǵasy Bekejan Jákeev.
Avtoparkti jańartý baǵdarlamasy aiasynda biyl qazaqstandyq óndiristiń 129 JAC avtokóligin satyp alý kózdelgen. Sondai-aq otandyq óndirýshi «SemAZ» JShS-nen 52 inkassatorlyq avtokólik satyp alynady. Otandyq «KAMAZ Injiniring» JShS-nen 10 KAMAZ magistraldyq sedeldi tartqyshyn satyp alý josparlanǵan. Budan bólek, kompaniianyń óz qarajaty esebinen 10 Dongfeng avtokóligi satyp alyndy.
Dúniejúzilik poshta odaǵynyń qarjylandyrýy aiasynda qosymsha 5 jeńil fýrgon satyp alý josparlanýda.
«Qazpochta» AQ kólik parkin jańǵyrtý baǵdarlamasy 2027 jyly da kezeń-kezeńimen jalǵasady. Kelesi jyly 164 birlik kólik quralyn satyp alý josparlanǵan.
