«Kúlbiltelemei birden aitsaq, bul azaptaý faktileri týraly. Mysaly úshin ózimiz de kórdik. Áleýmettik jelilerdegi videolardy, jazbalardy sai-súiegiń syrqyrap qaraisyń. Ásirese arqasyna útik basylǵan taldyqorǵandyq Azamat Batyrbaev degen jigitke qatysty. Osydan habardarsyz ba?» dedi. Buǵan Qasym-Jomart Toqaev bylaisha jaýap qaiyrdy:
– Iá, bul másele jóninde jaqsy bilemin. Keibir azamattarymyz
meniń atyma beine úndeý jazyp, áleýmettik jelilerde taratyp jatyr. Muny da bilip otyrmyn. Osyǵan bailanysty men Ishki ister ministrligi men Bas prokýratýraǵa arnaiy tapsyrma berdim.
«Shash al dese, bas alatyn» áreketterge jol berýge bolmaidy. Qoǵamdyq komissiialar óz jumysyna kirisip ketti. Adam quqyqtary jónindegi ýákil Elvira Ázimova, belgili quqyq qorǵaýshylar: Aiman Omarova, Jemis Turmaǵambetova, Abzal Quspan jáne basqa da zańgerler jinalyp, arnaiy komissiialar qurdy. Olar ár istiń zańdylyǵyn qarap jatyr. Qoǵamdyq komissiialarǵa senimsizdik kórsetýge eshqandai sebep te, haqymyz da joq. Bilik te, quqyq qorǵaý organdary da jumystaryna aralaspaidy. Men de aralaspaimyn.
Árbir quqyq buzýshylyq deregi boiynsha sharalar qabyldanady. Kináli adamdar jazaǵa tartylady. Men úshin azamattarymyzdyń quqyǵy asa mańyzdy. Ásirese, qazirgi tańda muny eń mańyzdy másele dep aitýǵa bolady. Árbir is boiynsha ádil sheshim shyǵarý men úshin negizgi printsip bolyp tabylady.
– Al, buzaqylarǵa qatysty qandai is-sharalar qabyldanady?
– Buzaqylar týraly máselege kelsek. Keibir adamdar jazyqsyz azamattardy esh sebepsiz qamaýǵa aldy dep oilaidy da, osyndai jalǵan urandardy el ishinde taratady. Biraq, mynany umytpaýymyz kerek, solardyń ishinde lańkester de, qylmyskerler de bar.
Qarańyzshy, myńdaǵan adam qalany qiratyp, naǵyz terroristik áreketterge bardy. Biraq, qazir bári jai ǵana beibit azamattar bolyp shyqty. Buǵan kim senedi?
Jalpy, lańkesterdi, qaraqshylardy halyq qaharmandary, batyrlary dep aitýǵa bolmaidy. Bul – eshqandai shyndyqqa kelmeitin jalǵan ýáj. Eger biz aqiqatyna kóz jetkizbei, olardyń aitqanyna senetin bolsaq, elimizge taǵy bir úlken qaýip tóndiremiz. Bul qaraqshylardy Qazaqstanǵa shaqyrý degen sóz. Sondyqtan atalǵan máselede biz óte saq bolýymyz kerek. Árbir is boiynsha muqiiat tergeý júrgizýimiz qajet, – dedi Toqaev.
