9 qyrkúiekte Brent markaly munaidyń baǵasy barreline 100 dollardan asty. Mundai kórsetkish sońǵy ret shilde aiynyń sońynda tirkelgen edi. Saýda barysynda munai baǵasy 100,2 dollarǵa deiin kóterilip, keiin azdap tómendedi, dep habarlaidy dalanews.kz.
Baǵanyń ósýine Taiaý Shyǵystaǵy jaǵdaidyń ýshyǵýy sebep boldy. AQSh áskeri Irannyń munai tasymaldaityn tankerlerine soqqy jasaǵanyn habarlady. Buǵan jaýap retinde Iran Iordaniiadaǵy amerikalyq nysandarǵa jáne Ormýz buǵazy mańyndaǵy kemelerge shabýyl jasady. Sonymen qatar hýsitter Saýd Arabiiasynyń munai nysandaryna shabýyl jasaǵan.
Osy oqiǵalar Taiaý Shyǵystan munai jetkizý qiyndaýy múmkin degen qaýip týǵyzdy. Naryq qatysýshylaryn ásirese Ormýz buǵazyndaǵy jaǵdai alańdatyp otyr. Óitkeni álemde óndiriletin munaidyń edáýir bóligi osy buǵaz arqyly tasymaldanady. Eger munda keme qozǵalysy shektelse, munai tapshylyǵy týyndap, baǵa odan ári qymbattaýy múmkin.
Munaidyń qymbattaýy Qazaqstanǵa qosymsha tabys ákelýi yqtimal. Bul eksporttan túsetin kiris pen biýdjetke túsetin qarajattyń ósýine áser etedi. Alaida Qazaqstan munai tasymaldaýda Ormýz buǵazyna táýeldi emes. Otandyq munaidyń basym bóligi Kaspii qubyr konsortsiýmy arqyly Qara teńizge shyǵarylady.
