Batys Qazaqstan oblysyndaǵy Han toǵaiy orman-parki aýmaǵynda shyqqan órtti sóndirý jumystary jalǵasýda. Tilsiz jaýdy aýyzdyqtaýǵa eki tikushaq jumyldyrylyp, orman sharýashylyǵy men tótenshe jaǵdailar qyzmetiniń bólimsheleri jumys istep jatyr, dep habarlaidy dalanews.kz.
Órt týraly aqparat 27 shilde kúni saǵat 13:35-te túsken. Alǵash bolyp oqiǵa ornyna Oral orman jáne janýarlar dúniesin qorǵaý jónindegi kommýnaldyq memlekettik mekemesiniń qyzmetkerleri barǵan. Aldyn ala málimet boiynsha, órt elektr berý jelisiniń tiregi qulap, qysqa tuiyqtalý saldarynan shyqqan.
Órtti sóndirýge Batys Qazaqstan oblystyq Tótenshe jaǵdailar departamentiniń kúshteri, Qoshym orman bólimshesiniń qyzmetkerleri, sondai-aq Atyraý qalasy men Aqjaiyq aýdanyndaǵy Chapaev aýylynan kelgen aviatsiia jumyldyrylǵan.
BQO tabiǵi resýrstar jáne tabiǵat paidalanýdy retteý basqarmasynyń málimetinshe, jalyn shamamen 15 gektar aýmaqtaǵy úieńki men shaǵan aǵashtaryn sharpyǵan.
Órtti aýyzdyqtaý jumystaryna Tótenshe jaǵdailar ministrliginiń «Qazaviaqutqarý» AQ men Ekologiia jáne tabiǵi resýrstar ministrligine qarasty «Qazaviaormanqorǵaý» RMK-nyń tikushaqtary da tartyldy. 28 shilde saǵat 01:00-degi jaǵdai boiynsha órtti sóndirýge 80-ge jýyq adam, 10 birlik jerústi tehnikasy jáne eki tikushaq qatysqan. Áýe tehnikasy jalpy kólemi 68 tonna sýdy 46 ret tókken.
Kýágerlerdiń aitýynsha, qoiý tútin Oral qalasynyń ortalyǵyna, Zachagansk kentine jáne oǵan irgeles aýdandarǵa deiin taraǵan. Keibir turǵyndar kúl jaýǵanyn da habarlaǵan.
Oral qalasy ákimdiginiń málimetine sáikes, aptap ystyq pen qatty jeldiń áserinen qalanyń jekelegen aýdandarynda elektr energiiasy ýaqytsha óshken. Sonyń saldarynan shamamen 800 abonent jaryqsyz qalǵan. Qazirgi ýaqytta elektrmen jabdyqtaýdy qalpyna keltirý jumystary jalǵasyp jatyr.
