Batys Qazaqstan oblysynda 18 jastaǵy nemere inisin óltirip, máiitin jasyrǵan 26 jastaǵy er adam 12 jylǵa sottaldy. Qylmystan keiin ol segiz kún boiy týystarymen birge marqumdy izdeýge qatysyp, onyń joǵalǵany týraly áleýmettik jelide jazbalar jariialaǵan, dep habarlaidy dalanews.kz.
Kriminalnyi Kazahstan málimetinshe, oqiǵa 19 mamyrǵa qaraǵan túni Jánibek aýdanynda bolǵan. Birge ishimdik iship otyrǵan týystar arasynda janjal týyndap, aiyptalýshy asúi pyshaǵymen 18 jastaǵy jigitke keminde 15 ret jaraqat salǵan. Sondai-aq ony soqqyǵa jyqqan. Alǵan jaraqattarynan jas jigit oqiǵa ornynda kóz jumdy.
Osydan keiin er adam marqumnyń denesin úidiń artyndaǵy qoqys shuńqyryna kómip, uiyqtaýǵa ketken. Keiin segiz kún boiy otbasy músheleriniń qasynda júrip, joǵalǵan týysyn izdesken. Tipti áleýmettik jelige ony tabýǵa kómektesýdi suraǵan jazbalar jariialaǵan. Osy ýaqyt ishinde máiit úidiń mańynda jasyryn jatqan.
Qylmystyń mán-jaiy kýágerlerdiń bergen aiǵaqtary arqyly anyqtalǵan.
Sot er adamdy adam óltirgeni úshin kináli dep tanyp, ortasha qaýipsizdik deńgeiindegi túzeý mekemesinde 12 jyl bas bostandyǵynan aiyrý jazasyn taǵaiyndady. Sonymen qatar ol alkogolizm men esirtkige táýeldilikten májbúrli túrde emdelýge mindetteldi.
Sottalǵan azamat marqumnyń otbasyna moraldyq ziian úshin 12 mln teńge ótemaqy tóleýge tiis.
Qaza bolǵan jigittiń anasy taǵaiyndalǵan jazany tym jeńil dep sanaidy. Ol aiyptalýshyny keminde 20 jylǵa bas bostandyǵynan aiyrýdy suraǵan.
Sot úkimi ázirge zańdy kúshine engen joq.
