Batys Qazaqstan oblysynda sýbsidiiaǵa bólingen qarjy maqsatsyz paidalanylǵan. Bul derekti Shyńǵyrlaý aýdanynyń prokýratýrasy anyqtady, dep habarlaidy Dalanews.kz.
Prokýratýra málimetinshe, sýbsidiia berý kezinde 20 mln teńgeden astam biýdjet qarajatyn teris paidalaný faktileri anyqtaldy.
"Mysaly, 2021 jyly 25 jeltoqsanda sharýa qojalyǵy 442 asyl tuqymdy qoi satyp alýǵa ótinish berip, 6 mln 630 myń teńge kóleminde sýbsidiia alǵan. Taldaý barysynda bir jyldyń ishinde aýyl sharýashylyǵy janýarlaryn birdeilendirý jónindegi derekqordan atalǵan maldyń esepten shyǵarylǵany belgili boldy", - delingen habarlamada.
BQO prokýratýrasynan habarlaǵandai, Aýyl sharýashylyǵy ministriniń 2019 jylǵy 15 naýryzdaǵy buiryǵymen bekitilgen asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsidiialaý qaǵidalaryn bekitý týraly erejege sáikes mal basynyń jyl boiy saqtalýyn (mal shyǵynynyń zootehnikalyq normasyn qospaǵanda) qamtamasyz etý mindettelgen. Osy talaptyń buzylýy saldarynan memleketke 6 mln 630 myń teńge materialdyq shyǵyn keltirildi.
"Zańdy buzý faktileri boiynsha quzyretti organǵa tiisti qadaǵalaý aktisi engizildi. Kúni búginge deiin prokýratýranyń usynýy boiynsha memleketke 14,7 million teńge qaitaryldy. Qalǵan somany óndirý atqarýshylyq is júrgizý tártibinde júrgizilýde", - dep habarlady vedomstvodan.
