Áleýmettik jelide Batys Qazaqstan oblysynda máslihat depýtattary memleket qarjysyn óz qurylys kompaniialaryna baǵyttap, biýdjetti talan-tarajǵa salý shemasyn júzege asyryp jatqany týraly aqparat tarady, dep habarlaidy Dalanews.kz.
"Oian, qazaq!" arnasy málimetinshe, oblystyq máslihat depýtaty Dinmuhamed Sátbaev basqaratyn UNISERV kompaniiasy 2023 jyly “Bórli – Aksai – Jympity” avtojolynyń qurylysyn 15,5 mlrd teńgege baǵalaǵan.
"Alaida arada birneshe ai ótpei jatyp, sol joldyń quny aiaq astynan 27,5 mlrd teńgege deiin sharyqtap shyǵa kelgen. Qymbattatýǵa daýys bergenderdiń ishinde Sátbaevtyń ózi de bolǵan", - dep jazylǵan aqparatta.
Joldyń sapasy men qurylystyń nege keshigip jatqanyn tekserýdiń ornyna BQO ákimdigi men oblystyq máslihat bul jobany bir aýyzdan "qosymsha qarjylandyrý kerek" dep sheshken.
"Máslihat tóraǵasy Murat Muqaevtyń jetekshiligimen ótken jiynda depýtattar biýdjetten taǵy 12 milliard teńge bólip berýge kelisim bergen. Nátijesinde jol qurylysynyń jalpy quny 27,5 milliard teńgege jetken. Al jol áli kúnge deiin aiaqtalǵan joq.
Eń soraqysy, qurylys qunynyń qymbattaýyn negizdeitin qujattarda óreskel burmalaý, aýditorlyq esepterdegi sáikessizdik, qala qurylysyn baqylaý basqarmasy mamandarynyń jalǵan qoltańbalary kezdesedi. Soǵan qaramastan oblystyq ákimdik janyndaǵy biýdjet komissiiasy bul málimetterge súienip, qarjy bólýdi maquldaǵan", - dep jazylǵan derekte.
Depýtat pen qurylys kompaniiasy arasyndaǵy bul múddeler qaqtyǵysyna quqyq qorǵaý organdary da, memlekettik aýdit te ázirge únsiz. Al "halyq qalaýlysynyń" mandaty men merdigerlik kompaniiasynyń múddesi qai kezde ajyratylady - ol jaǵy beimálim.
