Batys Qazaqstan oblysynda dárigerdi óltirgen SOBR-dyń burynǵy qyzmetkerine úkim shyqty. Ol 10 jylǵa sottaldy dep habarlaidy Dalanews.kz.
2024 jylǵy 17 qarashada Batys Qazaqstan oblysy Tasqala aýdanynda 30 jastaǵy feldsher Diiar Tuiysov aýyr soqqydan keiin kóz jumdy. Ol sol túni jumystan úiine qaityp bara jatyp, dostarynyń úiinde kidirip qalǵan. Sol tún — onyń tuńǵysh balasy dúniege kelgen kún bolatyn.
Tergeý materialdaryna sáikes, saǵat 23:00 shamasynda Diiardyń ishimdik ishken dosy synyptas qyzǵa qatelesip qońyraý shalyp, qaryz suramaq bolady. Alaida bul qońyraý qyzdyń kúieýine unamai, sózge kelip qalǵan. Osydan keiin áiel óz inisi – burynǵy SOBR qyzmetkeri, 23 jastaǵy Alihan Biǵazievke shaǵymdanady. Biǵaziev bir top dosymen birge "qaryndasynyń namysyn qorǵaýǵa" shyǵady.
Aldymen olar bir jigitti úiinen taýyp, soqqyǵa jyǵady. Odan keiin kóshede kólik ishinde otyrǵan taǵy birneshe jigitti, onyń ishinde Diiar Tuiysovty kezdestiredi.
– Alihan Biǵaziev kúsh qurylymynda jumys istegen, jaýyngerlik daiyndyqtan ótken, fizikalyq kúshi joǵary adam bolǵan. Ol Diiardyń basyna aýyr soqqy jasap, densaýlyǵyna qaýip tóndiretinin bilgen, – delingen sot qujattarynda.
Keiin 24 jastaǵy Elaman Dosqaliev Diiardyń basyna keminde úsh ret soqqy jasaǵan. Diiar Tuiysov alǵan jaraqatynan aýrýhanada kóz jumdy. Saraptama onyń ólimine jabyq bas-mi jaraqaty men miǵa qan ketý sebep bolǵanyn anyqtady.
Aýrýhanada taǵy bir aýyl turǵynyna shabýyl jasalǵan: Elaman Dosqaliev pen úshinshi aiyptalýshy – 19 jastaǵy Mirlan Nursultanov taǵy bir azamatty soqqyǵa jyqqan.
Sotta aiyptalýshylar birigip áreket etkenderin joqqa shyǵardy. Alaida marqumnyń týystary buǵan senbeidi. Diiar Tuiysovtyń ákesi Berik Irjanov:
– Ulym feldsher bolyp jumys istedi, adamdarǵa kómektesýge árqashan daiyn edi. Ol qanshama balany bosandyryp, talai adamnyń ómirin saqtap qaldy. Al onyń ómirin sol adamdar qiyp ketti. Balam eshkimmen janjaldaspaityn, óte jaily adam edi. Men ádil úkim shyǵarylyp, barlyq kináli jazaǵa tartylýyn talap etemin, – dedi.
Sot sheshimimen Alihan Biǵaziev QR QK eki baby boiynsha – «Adam ólimine ákep soqqan densaýlyqqa qasaqana aýyr ziian keltirý» jáne «Sabaý» – kináli dep tanylyp, 10 jylǵa bas bostandyǵynan aiyryldy. Ol jazasyn ortasha qaýipsizdik deńgeiindegi koloniiada óteidi.
Aita keteiik, oqiǵa kezinde Biǵazievtiń politsiia qatarynda ekeni sotta dáleldense de, oblystyq PD ol politsiia qyzmetkeri emes dep málimdegen. Olar Biǵazievtiń ishki ister organdarynan shyǵarylǵanyn aitqanymen, buiryq nómiri men jumystan shyǵarylǵan kúnin usynýdan bas tartqan.
Elaman Dosqaliev te dál sol baptar boiynsha kináli dep tanylyp, 10 jylǵa sottaldy. Al úshinshi aiyptalýshy Mirlan Nursultanov «Buzaqylyq» baby boiynsha kináli dep tanylyp, 3 jylǵa bas bostandyǵynan aiyryldy.
Sýdia Áliia Teberikova úkimdi jariia etip:
– Sot aiyptalýshylardyń kinásin tolyq dáleldengen dep esepteidi. Úkimge apelliatsiialyq tártippen shaǵym túsirýge bolady, – dedi.
