باتىس قازاقستان وبلىسىندا دارىگەردى ولتىرگەن سوبر-دىڭ بۇرىنعى قىزمەتكەرىنە ۇكىم شىقتى. ول 10 جىلعا سوتتالدى دەپ حابارلايدى Dalanews.kz.
2024 جىلعى 17 قاراشادا باتىس قازاقستان وبلىسى تاسقالا اۋدانىندا 30 جاستاعى فەلدشەر ديار تۇيىسوۆ اۋىر سوققىدان كەيىن كوز جۇمدى. ول سول ءتۇنى جۇمىستان ۇيىنە قايتىپ بارا جاتىپ، دوستارىنىڭ ۇيىندە كىدىرىپ قالعان. سول ءتۇن — ونىڭ تۇڭعىش بالاسى دۇنيەگە كەلگەن كۇن بولاتىن.
تەرگەۋ ماتەريالدارىنا سايكەس، ساعات 23:00 شاماسىندا دياردىڭ ىشىمدىك ىشكەن دوسى سىنىپتاس قىزعا قاتەلەسىپ قوڭىراۋ شالىپ، قارىز سۇراماق بولادى. الايدا بۇل قوڭىراۋ قىزدىڭ كۇيەۋىنە ۇناماي، سوزگە كەلىپ قالعان. وسىدان كەيىن ايەل ءوز ءىنىسى – بۇرىنعى سوبر قىزمەتكەرى، 23 جاستاعى اليحان بيعازييەۆكە شاعىمدانادى. بيعازييەۆ ءبىر توپ دوسىمەن بىرگە "قارىنداسىنىڭ نامىسىن قورعاۋعا" شىعادى.
الدىمەن ولار ءبىر جىگىتتى ۇيىنەن تاۋىپ، سوققىعا جىعادى. ودان كەيىن كوشەدە كولىك ىشىندە وتىرعان تاعى بىرنەشە جىگىتتى، ونىڭ ىشىندە ديار تۇيىسوۆتى كەزدەستىرەدى.
– اليحان بيعازييەۆ كۇش قۇرىلىمىندا جۇمىس ىستەگەن، جاۋىنگەرلىك دايىندىقتان وتكەن، فيزيكالىق كۇشى جوعارى ادام بولعان. ول دياردىڭ باسىنا اۋىر سوققى جاساپ، دەنساۋلىعىنا ءقاۋىپ توندىرەتىنىن بىلگەن، – دەلىنگەن سوت قۇجاتتارىندا.
كەيىن 24 جاستاعى ەلامان دوسقالييەۆ دياردىڭ باسىنا كەمىندە ءۇش رەت سوققى جاساعان. ديار تۇيىسوۆ العان جاراقاتىنان اۋرۋحانادا كوز جۇمدى. ساراپتاما ونىڭ ولىمىنە جابىق باس-مي جاراقاتى مەن ميعا قان كەتۋ سەبەپ بولعانىن انىقتادى.
اۋرۋحانادا تاعى ءبىر اۋىل تۇرعىنىنا شابۋىل جاسالعان: ەلامان دوسقالييەۆ پەن ءۇشىنشى ايىپتالۋشى – 19 جاستاعى ميرلان نۇرسۇلتانوۆ تاعى ءبىر ازاماتتى سوققىعا جىققان.
سوتتا ايىپتالۋشىلار بىرىگىپ ارەكەت ەتكەندەرىن جوققا شىعاردى. الايدا مارقۇمنىڭ تۋىستارى بۇعان سەنبەيدى. ديار تۇيىسوۆتىڭ اكەسى بەرىك يرجانوۆ:
– ۇلىم فەلدشەر بولىپ جۇمىس ىستەدى، ادامدارعا كومەكتەسۋگە ءارقاشان دايىن ەدى. ول قانشاما بالانى بوساندىرىپ، تالاي ادامنىڭ ءومىرىن ساقتاپ قالدى. ال ونىڭ ءومىرىن سول ادامدار قيىپ كەتتى. بالام ەشكىممەن جانجالداسپايتىن، وتە جايلى ادام ەدى. مەن ءادىل ۇكىم شىعارىلىپ، بارلىق كىنالى جازاعا تارتىلۋىن تالاپ ەتەمىن، – دەدى.
سوت شەشىمىمەن اليحان بيعازييەۆ ق ر قك ەكى بابى بويىنشا – «ادام ولىمىنە اكەپ سوققان دەنساۋلىققا قاساقانا اۋىر زيان كەلتىرۋ» جانە «ساباۋ» – كىنالى دەپ تانىلىپ، 10 جىلعا باس بوستاندىعىنان ايىرىلدى. ول جازاسىن ورتاشا قاۋىپسىزدىك دەڭگەيىندەگى كولونيادا وتەيدى.
ايتا كەتەيىك، وقيعا كەزىندە بيعازييەۆتىڭ پوليسيا قاتارىندا ەكەنى سوتتا دالەلدەنسە دە، وبلىستىق پد ول پوليسيا قىزمەتكەرى ەمەس دەپ مالىمدەگەن. ولار بيعازييەۆتىڭ ىشكى ىستەر ورگاندارىنان شىعارىلعانىن ايتقانىمەن، بۇيرىق ءنومىرى مەن جۇمىستان شىعارىلعان كۇنىن ۇسىنۋدان باس تارتقان.
ەلامان دوسقالييەۆ تە ءدال سول باپتار بويىنشا كىنالى دەپ تانىلىپ، 10 جىلعا سوتتالدى. ال ءۇشىنشى ايىپتالۋشى ميرلان نۇرسۇلتانوۆ «بۇزاقىلىق» بابى بويىنشا كىنالى دەپ تانىلىپ، 3 جىلعا باس بوستاندىعىنان ايىرىلدى.
سۋديا ءاليا تەبەريكوۆا ۇكىمدى جاريا ەتىپ:
– سوت ايىپتالۋشىلاردىڭ كىناسىن تولىق دالەلدەنگەن دەپ ەسەپتەيدى. ۇكىمگە اپەللياسيالىق تارتىپپەن شاعىم تۇسىرۋگە بولادى، – دەدى.
