Batys Qazaqstan oblysynda jolaýshylar avtobýsy órtenip ketti. Oqiǵa Samara – Shymkent tas jolynyń Terekti aýdanyna qarasty bóliginde bolǵan, dep habarlaidy dalanews.kz.
Órt shyqqan kezde avtobýs ishinde 37 jolaýshy bolǵan. Olardyń barlyǵy kólikten ózdiginen shyǵyp úlgergen.
Oqiǵa ornyna Tótenshe jaǵdailar departamentiniń qyzmetkerleri jetip, órtti sóndirdi. Tilsiz jaýdy aýyzdyqtaýǵa segiz qutqarýshy men eki tehnika jumyldyrylǵan.
Aldyn ala málimet boiynsha, zardap shekkender joq.
Avtobýs Oral – Qaratóbe baǵyty boiynsha qatynaǵan. Jolaýshylar arasynda balalar men egde jastaǵy adamdar da bolǵan.
«Bul Oraldan Qaratóbege qatynaityn avtobýs. Áreń shyǵyp úlgerdik», – degen jolaýshylardyń biri.
Qazirgi ýaqytta avtobýstyń neden órtengeni naqtylanyp jatyr.
