Vıse-premer, Sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtab jetekshisiniń orynbasary Qanat Bozymbaev Oraldaǵy sý tasqynynyń belsendi kezeńine daıyndyq barysyn tekserip, ózen jaǵalaýlary men qorǵanys bógetterin nyǵaıtýdy tapsyrdy, – dep habarlaıdy Dalanews.kz.

Oraldaǵy Jaıyq ózeniniń sý deńgeıi saǵat 12:00-de 7,58 metr boldy. Sarapshylar sý tasqynynyń sharyqtaý shegi 20-21 sáýirde bolady dep boljap otyr.

Jaıyq ózeniniń qala tusymen ótetin boıy 28 shaqyrym, onyń 21 shaqyrymyna bilikter men bógetterdi nyǵaıtý jáne salý jumystary júrgizilip jatyr.

Bul jumystarǵa 1300 erikti men 800-ge jýyq áskerı qyzmetker, 300-den astam arnaıy tehnıka tartylǵan. Sonymen qatar búgin Oralǵa Almaty, Qyzylorda jáne Túrkistannan 150 birlik qosymsha tehnıka keledi.

Vıse-premer jer bilikteriniń deńgeıin 12 metr deıin kóterýdi tapsyrdy (qazir qala boıynsha qaýipti meje 8,5). Sondaı-aq Oraldy Shaǵan ózeniniń jaıylmasy jaǵynan qorǵaý týraly sheshim qabyldandy.

Sý basý qaýpi joǵary aýmaqtar –  qalanyń saıajaı massıvteri, Bórli, Terekti, Aqjaıyq jáne Báıterek aýdandaryndaǵy eldi mekender. Ózen alaby boıyndaǵy baý-baqsha seriktestikteriniń turǵyndary evakýasıalandy. Oralda 18 jedel-evakýasıalyq pýnkt ashyldy. Munda 1690 adam ornalastyrylǵan.