Jýrnalist Ashat Niiazov belgili jazýshy Shyńǵys Aitmatovtyń uly Eldar Aitmatovpen suhbat barysynda Asqar Aqaev pen Nursultan Nazarbaevqa qatysty el arasynda aitylyp júrgen áńgimeler jaily surady, dep dalanews.kz tilshisi kznews.kz saityna silteme jasap habarlaidy.
Aldymen jýrnalist Shyńǵys Aitmatovtyń Qyrǵyzstannyń burynǵy prezidenti Asqar Aqaevtyń bilikke kelýine yqpal etkeni týraly aqparatqa qatysty saýal qoidy.
Eldar Aitmatov bul áńgimeniń shyndyqqa janaspaitynyn aitty. Onyń sózinshe, Aqaevtyń kandidatýrasyn sol kezdegi partiia ókilderi ózderi usynǵan.
"Bul tolyqtai shyndyqqa sáikes kelmeidi. Meniń bilýimshe, Asqar Aqaevtyń kandidatýrasyn partiia qairatkerleri ózderi usynǵan. Ákem bul protseske qatyspaǵan, tipti Aqaevtyń usynylǵanynan da habarsyz bolǵan", – dedi ol.
Sondai-aq Eldar Aitmatov Shyńǵys Aitmatovtyń sol kezde Qyrǵyzstan prezidenti retinde basqa adamdy kórgisi kelgenin jetkizdi.
Suhbat barysynda Nursultan Nazarbaevqa qatysty da tyń derek aityldy. Eldar Aitmatovtyń aitýynsha, Qazaqstanda birinshi basshyny taǵaiyndaý máselesi qaralyp jatqan kezde Nazarbaev Shyńǵys Aitmatovtan Mihail Gorbachevpen kezdesý uiymdastyrýǵa kómek suraǵan.
Onyń sózinshe, bastapqyda Gorbachev Nazarbaevty qabyldaǵysy kelmegen.
"Nursultan Ábishuly qabyldaý bólmesinde kútip otyrǵan. Al Gorbachev onymen kezdespeitinin, sóilespeitinin aitqan. Keiin ákem Mihail Sergeevichti Nazarbaevty qabyldap, sóilesýge kóndirdi", – dedi Eldar Aitmatov.
Aitmatovtyń uly ákesiniń Gorbachevke Qazaqstandaǵy jaǵdaidy túsindirip, basqa kandidattyń taǵaiyndalýy el ishinde tolqý týdyrýy múmkin ekenin aitqanyn jetkizdi.
"Sol kezde ákem bul sheshimniń qabyldanýyna barynsha yqpal etti", – dedi ol.
Eldar Aitmatovtyń bul esteligi Shyńǵys Aitmatovtyń keńestik kezeńdegi saiasi protsesterde de salmaǵy bolǵanyn kórsetedi.
