Nazarbaev áýletiniń eks-qudasy, kásipker Qaırat Boranbaev Paralımpıadalyq daıyndyq ortalyǵynda jýrnalıserdiń suraqtaryna jaýap berý barysynda aldaǵy josparlaryn da jarıalady, - dep habarlaıdy Dalanews.kz.

Bostandyqqa shyqqannan keıin kásipker alǵash ret BAQ ókilderine osylaı jaýap berdi.

"Kásipkerlikpen aınalysý jáne paıda ákelý (josparym. - esk.). Aınalysatyn jobalarym jetkilikti, olardan alystamadym", - dedi Qaırat Boranbaev.

Jýrnalıser kásipkerden aktıvteri tárkilengennen keıin qandaı qarajatqa "kún kórip" júrgenin surady. 

"Qaırat" fýtbol klýby qalaı jumys istep tur? Bul - jalǵyz jeke klýb. Iá, jarnama men barlyq demeýshi kompanıanyń quıǵany. Barlyq kompanıa jumys isteıdi. Shynymdy aıtsam, kompanıalarǵa jumys isteýge ruqsat berilgenine rızamyn. Bizdiń holdıń - basqarýshy kompanıa. Bizde barlyq bıznes jumys isteıdi. Iá, problemalar bar, bul - qalypty jaǵdaı, bárinde problemalar bar shyǵar", - dedi Boranbaev.

Kásipker McDonald's fastfýd jelisin de Qazaqstanǵa qaıtarǵysy keletinin jetkizdi.

"McDonald’s Qazaqstanǵa oralǵysy kelse ony oılastyramyz. Bul brend Qazaqstanda tanymal. Segiz jyl ishinde kóp nárseni úırendik, arnaıy standarttardy saqtadyq. Árıne, McDonald’s Qazaqstanǵa oralǵanyn qalar edik, ol úshin azdaǵan ýaqyt qajet", - deıdi Boranbaev.   

Onyń sózinshe, fastfýd jelisiniń qazaqstandyq franshızasy logıstıka boıynsha máseleler týyndaǵandyqtan jabylyp qalǵan. Sebebi meıramhanaǵa qajet barlyq ónim Reseıden tasymaldanatyn kórinedi. 

Aıta keteıik, byltyr 6 qarashada Qaırat Boranbaev bostandyqqa shyqty. Al oǵan deıin naýryzda ol 8 jylǵa sottaldy. Qyrkúıekte jaza merzimi 6 jylǵa deıin qysqardy.

Sonymen qatar, "baı quda" Astananyń ortalyǵyndaǵy 4 juldyzdy qonaqúıdi, basqa da biraz múlikti memleket menshigine tapsyrdy. Al aýmaǵy bes myń sharshy metrden asatyn qonaqúı kesheniniń jyldyq aınalymy shamamen 900 mıllıon teńgeden asady eken.