Kásipker Qairat Boranbaevtyń ieliginen ketken Astanadaǵy qymbat qonaqúi qaita satýǵa shyǵaryldy, - dep habarlaidy Dalanews.kz.
Astananyń Investitsiialar jáne kásipkerlikti damytý basqarmasy Qairat Boranbaev tergeýmen yntymaqtastyq aiasynda memleketke tapsyrǵan Comfort Hotel Astana qonaqúi keshenin qaita satýǵa shyǵardy. 27 naýryzǵa belgilengen alǵashqy saýda-sattyq qatysýshylardan ótinim bolmaýyna bailanysty ótpegen.
"Satyp alý quqyǵymen nysandy senimgerlik basqarýǵa berý boiynsha tender 25 sáýirge belgilendi. Bastapqy quny ózgerissiz qalyp otyr: 3 919 431 715 teńge. Kepildik jarna 587,9 million teńge bolady.
Tenderdiń sharttary boiynsha jańa iesi nysandy tek qonaqúi biznesin júrgizý úshin paidalana alady. Satyp alýshynyń merzimi ótken kreditorlyq bereshegi bolmaýy kerek. Sondai-aq, onyń Qazaqstanda qonaqúilerdi basqarýda keminde jeti jyl tájiribesi bolýǵa tiis", - dep jazylǵan informburo.kz málimetinde.
Buǵan deiin de Investitsiialar jáne kásipkerlikti damytý basqarmasy Comfort Hotel-di 3,9 milliard teńgege satyp alý quqyǵymen bes jylǵa senimgerlik basqarýǵa berýdi josparlap otyrǵany týraly aqparat tarady.
Sol kezde satylym 27 naýryzda júzege asyrylady jáne qonaqúi jalǵyz adamǵa berilýi múmkin ekeni aityldy. Jańa basshy biznestiń maqsatyn saqtaýǵa mindetti.
"Qarjylyq esep boiynsha byltyr qonaqúidiń taza tabysy 65,6 million teńge bolǵan", - dep jazylǵan edi málimette.
Aita keteiik, buǵan deiin tergeýmen erikti yntymaqtastyq aiasynda QMA Qairat Boranbaevtyń múlkin memleketke qaitarý sharalaryn qabyldady.
Qairat Boranbaevtyń kompaniialary Memlekettik múlik komitetine jalpy quny 1,4 milliard teńgeden asatyn Comfort Hotel Astana qonaqúi keshenin memleket menshigine óz erkimen berý úshin tiisti ótinimder berdi.
"Aýmaǵy 5 myń sharshy metrden asatyn bul qonaqúi kesheniniń jyldyq ainalymy 900 million teńgege jýyq", - dep jazylǵan edi QMA málimetinde.
Alǵashynda qoldanystaǵy zańnamaǵa sáikes bul nysandy demalys, saýyqtyrý jáne bilim berý ortalyqtaryn uiymdastyrý, áleýmettik maqsatta paidalaný josparlanǵan edi.
