Nazarbaev áýletiniń eks-qudasy, kásipker Qairat Boranbaevqa tiesili bolǵan fitnes klýb memlekettik satyp alý portalyna shyqty, - dep habarlaidy Dalanews.kz.
Press.kz málimetinshe, F link (Fitnation klýby) kompaniiasy memlekettik satyp alý portaly arqyly ioga, boks, pilates jáne zýmba boiynsha toptyq sabaqtarǵa jattyqtyrýshylar jinap jatyr. Olarǵa Qostanai, Almaty jáne Astana qalalaryndaǵy filialdarda jumys isteý úshin qyzmetkerler qajet.
"Qazir kompaniia Almatydaǵy memlekettik aktivter basqarmasyna tiesili, al ony Aslan Muhamedjan basqarady", - dep jazylǵan derekte.
Aita keteiik, kásipker buǵan deiin fitnes-klýbtar jelisin memleketke berdi. Keiin Qarjy monitoring agenttigi bul nysandar áleýmettik maqsattarda paidalanylatynyn habarlady.
Byltyr 6 qarashada Qairat Boranbaev bostandyqqa shyqty. Al oǵan deiin naýryzda 8 jylǵa sottaldy. Qyrkúiekte jaza merzimi 6 jylǵa deiin qysqardy.
"Bai quda" Astananyń ortalyǵyndaǵy 4 juldyzdy qonaqúidi, basqa da biraz múlikti memleket menshigine tapsyrdy. Sonyń ishinde resmi derekterge súiensek, aýmaǵy bes myń sharshy metrden asatyn qonaqúi kesheniniń jyldyq ainalymy shamamen 900 million teńgeden asady eken.
Buǵan deiin zańger Abzal Quspan Qairat Boranbaev qandai sebeppen erte shyqqanyn túsindirdi.
"Protsestik kelisim jasaldy. Ol kodeksimizde 2014 jyldan bastap endi. 2015 jyldan bastap qoldanylady. Boranbaev qylmysy ekonomikalyq qylmys dep tanyldy. Sybailas jemqorlyq emes, qańtar oqiǵasyna qatysy bar sekildi aýyr zardaptary joq. Sondyqtan ol keltirilgen shyǵyndy ornyna keltirdi. Meniń bilýimshe, ol protsestik kelisim arqyly shyqqan", - dedi depýtat.
