Kompaniianyń 100% aktsiiasy memleket menshigine berilgeni, kelissóz quny 35,4 mlrd teńgege baǵalanǵany belgili boldy.
Kásiporyn ótken aida qorshaǵan ortaǵa ziian keltirgeni úshin memleket esebine 1,2 mlrd teńge ótegen bolatyn, budan bólek eńbek zańnamasyn eskermegeni úshin 70 mln teńge ótemaqy tólegen.
Boranbaev bailanysty delingen kompaniianyń zańdy belden bastap, baqylaýshy organdardyń eskertýine qulaq aspaǵany qoǵamnyń narazylyǵyn týǵyzǵan. Kompaniia qyzmetkerleri óz kezeginde basshylyq tarapynan oryn alǵan kóptegen zańbuzýshylyqqa shaǵymdanǵan bolatyn.
Phystech II týraly ne belgili?
eGov málimeti boiynsha, «Phystech II» AQ 2015 jyly tirkelgen. Shiki munai jáne ilespe gaz óndirýmen ainalysady. Quryltaishylary kórsetilmegen, onyń jetekshisi Baijaliev Ernar Berikbaiuly ekeni belgili. Munai Mańǵystaý oblysyndaǵy Soltústik Qarajanbas ken ornynda óndiriledi.
KASE saitynda kompaniianyń 100% qatysý úlesi bar jalǵyz aktsioneri – «Qaztýrboremont» holding kompaniiasy» JShS ekeni jazylǵan.
Boranbaevtyń bul kompaniiaǵa qandai qatysy bar?
2021 jyly Forbes Kazakhstan basylymy Nazarbaevtardyń burynǵy qudasy, millioner Qairat Boranbaevty «Qaztýrboremont» holdingtik kompaniiasy» JShS-ne ielik etetinin, ol arqyly Phystech II munai kompaniiasyndaǵy úlesine ielik etetinin jazǵan.
Bul týraly kompaniianyń 2020 jylǵy qarjylyq esebinde de jazylǵan. Qujatta «2020 jyldyń 31 naýryzyndaǵy jaǵdai boiynsha kompaniia aktsiialary 100% «Qaztýrboremont» holdingtik kompaniiasyna (QR rezidenti) tiesili» ekeni kórstilgen.
«Túpkilikti baqylaýǵa ie taraptar: Qazaqstan Respýblikasynyń azamaty Óserov Ashat Ǵabdýáliuly; Qazaqstan Respýblikasynyń azamaty Boranbaev Qairat Sovetauly», – delingen qujatta.
...
Buǵan deiin qarjy monitoring agentigi (QMA) kásipker Qairat Boranbaev quny 120 mlrd teńge bolatyn aktivin memleketke qaitarǵanyn málimdegen.
"Tergeý sheńberinde jalpy quny 90 mlrd teńgeden asatyn aktivti, onyń ishinde: munai ken ornyn, gaz taratý kompaniiasyn, servis salasyndaǵy kásiporyndy, qonaq úi jáne saýda-oiyn-saýyq keshenderin, fitnes ortalyqtar jelisin, keńse úi-jailaryn jáne basqa da aktivterdi memleket menshigine erikti túrde qaitarý jóninde sharalar qabyldandy. Sonymen birge Qairat Boranbaev bilim berý infraqurylymyn qoldaý qoryna 30 mlrd teńge aýdardy" dep jazylǵan habarlamada.
Vedomstvonyń habarlaýynsha, bul nysandardyń barlyǵy memlekettik organdar men kompaniialardyń balansyna beriledi, al qarajat bilim berý infraqurylymdaryn jaqsartýǵa paidalanylmaq.
"Buǵan deiin Qairat Boranbaev tabiǵi gaz importy kezinde qarajatty jymqyrý epizody boiynsha tergeý aiasynda 14,5 mlrd teńge kóleminde materialdyq shyǵyndy ótegen. Agenttik zańsyz aktivterdi izdeý jáne qaitarý boiynsha jumysty jalǵastyryp jatyr" dep jazylǵan habarlamada.
Biyl tamyzda jergilikti BAQ Boranbaevtyń advokatyna súiene otyryp, kásipker tergeý organdarymen protsessýaldyq kelisim jasaýǵa keliskenin, bas bostandyqtan aiyrylý jazasynyń ornyna kináni moiyndap, shyǵyndy óteýge keliskenin jazǵan.
Forbes basylymy Boranbaevty Qazaqstandaǵy eń yqpaldy bes kásipkerdiń qataryna jatqyzǵan. Ol eldegi "Esentai moll", "RitsKarlton", "RahatPalas", "Almaly" syndy qonaq úi, saýda ortalyqtaryna tolyq jáne jartylai ielik etken. Shetelde de jyljymaityn múlikteri bar.
