Kásipker Qairat Boranbaev qaitaryp bergen Comfort Hotel Astana qonaqúiiniń jańa iesi paida boldy, - dep habarlaidy Dalanews.kz.
25 sáýirde Comfort Hotel Astana qonaqúi keshenin satyp alý quqyǵymen senimgerlik basqarýǵa berý jónindegi tender ótken. Buǵan deiin qonaqúi Qairat Boranbaevqa tiesili bolǵan. Ol qonaqúidi tergeýmen yntymaqtastyq negizinde memleketke qaitarǵan.
Tender júrgizilip jatqan kezde onyń statýsy «Tenderlik (konkýrstyq) komissiianyń/satýshynyń ótinimderdi qaraýy» dep belgilengen. Al jaqynda statýs «Ótkizildi» dep ózgertilgen.
Elektrondyq saýda alańynyń derekteri boiynsha, saýda-sattyq jeńimpazy basqarmaǵa 3,92 mlrd teńgege qonaqúi aldy.
Tenderdiń sharttary boiynsha ǵimarattyń jańa iesi nysandy tek qonaqúi biznesin júrgizý úshin paidalana alady. Sondai-aq onyń Qazaqstanda qonaqúilerdi basqarýda keminde jeti jyl tájiribesi bolýy tiis. Tender jeńimpazy barlyq talap saqtalǵan jaǵdaida, shartty jasasqan kúnnen bastap bir jyldan erte emes qonaqúidi merziminen buryn satyp ala alady.
15 sáýirde kásipker Qairat Boranbaevtyń ieliginen ketken Astanadaǵy qymbat qonaqúi qaita satýǵa shyǵarylǵan bolatyn.
Astananyń Investitsiialar jáne kásipkerlikti damytý basqarmasy Qairat Boranbaev tergeýmen yntymaqtastyq aiasynda memleketke tapsyrǵan Comfort Hotel Astana qonaqúi keshenin qaita satýǵa shyǵardy. 27 naýryzǵa belgilengen alǵashqy saýda-sattyq qatysýshylardan ótinim bolmaýyna bailanysty ótpegen.
"Satyp alý quqyǵymen nysandy senimgerlik basqarýǵa berý boiynsha tender 25 sáýirge belgilendi. Bastapqy quny ózgerissiz qalyp otyr: 3 919 431 715 teńge. Kepildik jarna 587,9 million teńge bolady.
Tenderdiń sharttary boiynsha jańa iesi nysandy tek qonaqúi biznesin júrgizý úshin paidalana alady. Satyp alýshynyń merzimi ótken kreditorlyq bereshegi bolmaýy kerek. Sondai-aq, onyń Qazaqstanda qonaqúilerdi basqarýda keminde jeti jyl tájiribesi bolýǵa tiis", - dep jazylǵan informburo.kz málimetinde.
Buǵan deiin de Investitsiialar jáne kásipkerlikti damytý basqarmasy Comfort Hotel-di 3,9 milliard teńgege satyp alý quqyǵymen bes jylǵa senimgerlik basqarýǵa berýdi josparlap otyrǵany týraly aqparat tarady.
Sol kezde satylym 27 naýryzda júzege asyrylady jáne qonaqúi jalǵyz adamǵa berilýi múmkin ekeni aityldy. Jańa basshy biznestiń maqsatyn saqtaýǵa mindetti.
"Qarjylyq esep boiynsha byltyr qonaqúidiń taza tabysy 65,6 million teńge bolǵan", - dep jazylǵan edi málimette.
