Densaýlyq saqtaý ministri Aqmaral Álnazarova Qaraǵandydaǵy, buǵan deiin kásipker Qairat Boranbaevqa tiesili bolǵan farmatsevtikalyq kompaniianyń qazirgi jaǵdaiy týraly suraqqa jaýap berdi, dep habarlaidy Dalanews.kz.
Ministrdiń aitýynsha, bul kásiporyn qazirgi tańda memlekettik menshikte emes.
"Qajet bolǵan jaǵdaida kompaniianyń quryltaishylaryna qatysty qosymsha aqparatty berýge daiynbyz. Iá, bul – jekemenshik uiym, biraq onyń tájiribesi mol. Qazirgi tańda kombinat biryńǵai distribiýtordyń tiziminde bar jáne memleket esebinen óteletin dári-dármekter qatarynda belgili bir pozitsiialarǵa ie. Bul óndirýshiniń ónimderine qatysty resmi shaǵymdar tirkelmegen", – dedi ministr.
Sondai-aq Aqmaral Álnazarova kompaniianyń qandai ónim shyǵaratynyna toqtaldy.
"Qosymsha aqparatty keiinirek naqtylap aitamyz. Negizinen, bul kásiporyn onkologiialyq preparattar men insýlin óndiredi. Atap aitqanda, shyǵarylatyn insýlinniń biri ambýlatoriialyq deńgeide patsientterge tegin beriletin dári-dármek tizimine engizilgen. Bul dári Qaraǵandy farmatsevtikalyq kesheni arqyly biryńǵai distribiýtor bazasyna tirkelgen. Sondyqtan kásiporyn tolyqqandy jumys istep tur, jáne ministrlik tarapynan eshqandai resmi shaǵym joq", – dedi ministr Álnazarova.
Eske salaiyq, buǵan deiin Boranbaevqa tiesili bolǵan munai kompaniiasy 2025 jyly jekeshelendirilýi múmkin ekenin habarlaǵan edik.
Kompaniia 2023 jyldyń qazan aiynda memleket menshigine ótti — barlyq 100% aktsiiasy memleketke berilip, olardyń jalpy quny 35 milliard teńgeden asa baǵalanǵan.
Phystech II kompaniiasy Mańǵystaý oblysyndaǵy Soltústik Qarajanbas ken ornyn ielenedi. Alaida buǵan deiin kompaniia shyǵyn ǵana ákelip kelgen. Jekeshelendirý konkýrs nemese tikelei mámile arqyly júzege asyrylýy múmkin.
Aita keteiik, 2023 jyly Qairat Boranbaev asa iri mólsherde memleket qarajatyn urlady jáne qylmystyq kiristerdi zańdastyrdy degen kúdikpen ustaldy.
Keiinnen ol kóptegen aktivin memleketke qaitara bastady. Mysaly, byltyr qarashada Qairat Boranbaevpen bailanysty Qaraǵandydaǵy farmatsevtikalyq zaýyt biýdjetke 105 million teńgeni qaitardy.
