Ánshi-ártis qoǵamdyq pikirge qozǵaý sala almaidy
Búginde biliktiń mundai áreketin qarapaiym halyq qoldap otyr. Bul – bolýy tiis jaǵdai ǵoi. Eger osyndai ózgerister bolmasa «Qasiretti qańtar» kezinde jastardyń qany bekerge tógilgen bolyp shyqpai ma?
Sonyqtan bai-manaptardyń qolyna kisen salynyp, tergelip jatsa, oǵan janashyrlyqpen áste qaraýǵa bolamaidy.
Olarǵa ara túsip, Prezidentke hat jazǵan ánshi-ártisterdiń áreketi eshkimdi ekiudai kúige salmaýy kerek. Salmaitynyna da senimdimiz. Bekerge halyqtyń nalasyna qalmańyzdar.
Qazaqstanda túieni túgimen jutyp, otbasyna jaqyn júrip millioner atanyp, Forbes jýrnalynyń tiziminde túspeitin kásipkerlerdiń bári aq-adal jolmen baiydy dep eshkim aita almas.
Qoiny-qonyshy qarjyǵa tolǵan mundai jandar aiybyn tartar kezde birden berile salmaitynyda aqiqat. Ózi jyldar boiy jemdegen ánshi-ártister arqyly qoǵamdyq pikirge qozǵaý salyp, ózderin sútten aq, sýdan taza etip kórsetýge tyrysady.
Oǵan kúni keshe ǵana Roza Rymbaeva bastaǵan ánshi-ártisterdiń Nazarbaevtyń qudasy Qairat Boranbaevqa «shyryldap» ara túskeni aiqyn dálel bolady. Nesin aitasyz, olar Qairat Boranbaevty mádeniettiń qamqorshysy etip kórsetýge baryn salypty.
Boranbaev toiyna shaqyryp, birli-jarym ártistiń qaltasyna qarjy salyp, «qoldaý» kórsetse kórsetken shyǵar. Biraq budan Qairekeń ánshi-ártisterdiń mýzasyna ainalyp ketpegeni anyq qoi.
Tipti, bir mádeni mekemeniń remontyn jasaýǵa qol ushyn sozǵan shyǵar. Biraq budan keiin halyq Qairat Boranbaevtyń mádeniettiń janashyry dep qabyldamasy anyq.
Elimizdegi mádenietke qoldaý kórsetetin Mádeniet ministrligi bar. Biraq ol jerde Qairat Boranbaevtyń jumys istegenin estigen emespiz. Sondyqtan ánshi-ártisterdiń ony «mádeniettiń qamqorshysy» dep ara túsýi aqylǵa syimaidy.
«Qańtar qasireti» kezinde alańǵa shyǵyp, óziniń azamattyq pozitsiiasyn kórsete almaǵan ánshi-ártisterdiń bulaisha el arasyn syna qaǵyp, irtki salýyna (budan basqa qalai baǵalaýǵa bolady) moraldyq quqyǵy joq.
Aldaǵy ýaqytta mundai bai-manaptarǵa, joǵary laýazymdy qyzmetterde uzaq otyryp qalyp, qyzmetinen aiyrylǵan adamdarǵa arasha túsýshilerdiń sany artyp, Prezident Toqaevqa hat jazyp, áldeneni dáleldegisi keletinderdiń qatary arta túsetinin baiqap otyrǵan shyǵarsyzdar.
Osydan birshama ýaqyt buryn Talǵat Rysqulbekov áleýmettik jelide Qairat Satybaldynyń jaqsylyǵyn kórgen adamdar «oǵan nege ara túspeidi» dep tańqalysyn jasyrmaǵan bolatyn.
Sál shydasaq, ánshi-ártister men ziialy qaýym arasynan Bolat Nazarbaevqa aratúsýshiler tabylyp jatsa, tańqalmańyzdar.
Alena Gorbacheva «krýpnyi mediamenedjer» ma?
Kúni keshe ǵana áleýmettik jeline aqtaryp otyryp, «Habar 24» telearnasynyń direktory Alena Gorbacheva degen medimamannyń qyzmetinen ketip bara jatqanyna ujymyndaǵy tilshiler qaýymy «ah uryp» Qasym-Jomart Toqaevtyń atyna úshbý hat jazypty.
Hatta «Habar 24» arnasynyń jýrnalisteri ózderin jyldar boiy basqarǵan Alena Gorbachevadai mediamenedjerdi Qazaqstannan qolymyzǵa sham alyp izdesek te tappaitynymyzdy aityp, Prezidentke osy bir «ádiletsizdiktiń» aldy ótinipti.
Jýrnalsitika salasynda 20 jyldai eńbek etip kelemiz, biraq Alena Gorbacheva degen «krýpnyi mediamenedjerdiń» maqalasyn, telejobasyn kózimiz kórmepti. Ol úshin áriptesterimiz renjimei-aq qoisyn.
Alenýshka ortanqol jýrnalsit shyǵar. Biraq ony mediasalasyndaǵy «gigant maman» ekenin birinshi ret Toqaevqa jazǵan hattan bildik.
Maily jiliktiń basyn ustaǵandar qyzmetinen ketkende olar osyndai qyrynan tanylyp jatatyny bizge jaqsy tanys.
Shyndyǵynda «gigant mamandy» eshqandai bilik bir kúnde qyzmetinen alyp tastai almaidy ǵoi.
Álgi hatpen tanysqanda «Habar 24» aranasynyń jýrnalisteri Alena Gorbacheva kezinde arnanyń reitingisi kóterilgenin, jańalyqtar taratatyn birden-bir kanalǵa ainalǵanyn, tipti bizdi sheteldiń adamdary kóre bastaǵanyn (munysy tym artyqtaý endi), elimizdegi habar-oshardy bylai qoiyp, ózge eldegi saiasi oqiǵalardyń baǵa beretin (onysyn kórmeptik) telarnaǵa ainalǵanyn, elimiz ben ózge elderde tilshiler ustaýdy bastaǵanyn aityp, basshylaryna ara túsipti.
«Habar 24» arnasy uzaq jyl boiy biliktiń soiylyn soǵyp, saiasi propagandamen ainalysqanyn bes jasar balada biledi. Jyldar boiy memleketten milliardtaǵan qarjy alyp otyrdy.
Alena Gorbacheva tabanyn tozyp, jarnama tartyp telearnaǵa qarjy tartpaǵany anyq qoi. Sondyqtan ony kermettei menedjer dep áspettep, ara túsýdiń jóni joq.
Jyl saiyn memleketten milliardtaǵan qarjy alatyn, qarjylyq máselesi túbegeili sheshilgen telerana men gazetterdi jýrnalistika fakýltetin jańadan bitirgen kez kelgen jas maman basqaryp ketetinin umytpaýymyz kerek.
Sondyqtan memlekettiń mekemelerdi basqarǵan basshylardy maitalman uiymdastyrýshy, aýzymen qus tistegen mediamendjer maqtaý artyqtaý...
Eger milliondaǵan kórermender Alena Gorbacheva dál osylai baǵa berip arasha túsip jatsa onda, áńgime basqa.
Al Alena hanymnyń qol astyndaǵy jýrnalisteri óz basshylary bulaisha baǵa berýine moraldyq qaqysy joq. Alena Gorbacheva qyzmetinen ketse, «Habar 24» arnasy túńdigi jelpildep qulap qalmaidy. Sol baiaǵy ádepki jolynan ainymai, habar tarata bertini anyq. Sondyqtan «habarlyq» áriptester tym kóńilshektikke salyna bermeńizder.
Nurlan Jumahan
