Máskeýde áielin qyzǵanyshtan óltirdi degen kúdikpen er adam ustaldy, dep habarlaidy dalanews.kz.
Tergeý málimetinshe, oqiǵa 5 tamyz kúni erli-zaiyptylardyń páterinde bolǵan. Kúdikti áieline keminde bes ret pyshaq suqqan. Alǵan jaraqattarynan áiel oqiǵa ornynda kóz jumdy.
"Er adam ustaldy. Jaqyn ýaqytta ol tergeý amaldaryn júrgizý úshin vedomstvo bólimshesine jetkiziledi. Resei Qylmystyq kodeksiniń 105-baby 1-bóligi, iaǵni "Adam óltirý" boiynsha qylmystyq is qozǵaldy", – dep habarlady Máskeý qalasy boiynsha Tergeý komiteti.
Jas otbasy Máskeýge Armeniiadan kóship kelgen. 31 jastaǵy Ervand jol jóndeý kásipornynda eńbek etken. Onyń 30 jastaǵy jubaiy Anait ta sol jerde jumys istegen.
Erli-zaiyptylardyń nekede bir balasy bolǵan. Anait bala kútimine bailanysty demalysta júrip, balasyn balabaqshaǵa aparyp júrgen. Alaida kórshiler olardyń Piatnitskoe tas jolyndaǵy páterinen jii aiqai men janjal estilgenin aitqan.
Quqyq qorǵaý organdaryndaǵy derekkózdiń málimetinshe, er adam jubaiynyń bos ýaqyty kóp dep oilap, onyń basqa adammen qarym-qatynasy bar dep kúdiktengen.
"Ol kúni boiy jumysta júretin. Jubaiy balasyn balabaqshaǵa aparǵannan keiin ózine kóp ýaqyt qalady dep oilaǵan. Anaittiń ózi de jumys istegenine qaramastan, qyzǵanysh jas otbasynyń qarym-qatynasyndaǵy basty máselege ainalǵan", – dedi derekkóz.
Oqiǵa bolǵan kúni erli-zaiyptylar tańerteń Ervandtyń ata-anasyna barǵan. Olar da Piatnitskoe tas joly mańynda turǵan. Týystarynyń úiinde kóp otyrmai, keiin óz páterine qaitqan.
Jolda er adam áielin opasyzdyq jasady dep taǵy da aiyptai bastaǵan.
"Olar qyzǵanysh pen satqyndyq týraly sózden qaita janjaldasqan. Áiel bólmege kirip, esikti jaýyp, jylap otyrǵan. Alaida kúieýi esikti buzyp kirip, asúi pyshaǵymen áieline birneshe ret soqqy jasaǵan", – dedi quqyq qorǵaý organdaryndaǵy derekkóz.
Tergeý nusqasyna sáikes, er adam jubaiyna keminde bes ret pyshaq suqqan. Áiel alǵan jaraqattarynan sol jerde qaitys boldy.
Kúdikti qylmystan keiin jasyrynbaǵan. Oqiǵa ornyna tergeýshiler men kriminalister kelip, kýágerlerden jaýap ala bastady. Kúdiktiden jaýap alynǵannan keiin birqatar sot saraptamasy taǵaiyndalady.
