QR «Daryn» jastar syılyǵynyń ıegeri Aqberen Elgezektiń keıingi jyldary bestsellerge aınalǵan týyndysy «Bolmaǵan balalyq shaq» shyǵarmasynyń jelisi boıynsha túsirilgen dramalyq fılm.

Shynaıy oqıǵaǵa negizdelgen bul týyndy balalyq shaǵynan aýyr taǵdyrdyń synaǵyna túsken keıipkerdiń ómirin sýretteıdi. Basty keıipker qıyndyqtar men ádiletsizdikke qaramastan, óz jolyn tabýǵa jáne adamdyq qasıetterin saqtaýǵa tyrysady.

Fılmde «Bolmaǵan balalyq shaq» shyǵarmasyndaǵy oqıǵalarǵa negizdelgen sújetter kórinis tapqan. Oqıǵanyń shynaıylyǵy men keıipkerlerdiń tereń psıhologıalyq beınesi kórermenge úlken áser syılaıdy.

Sýret: Aıdyn Sahaman

Fılmniń bas prodúseri avtordyń ózi – Aqberen Elgezek, rejıseri – Aıdyn Sahaman, senarıin jazǵan – Efrat Sháripov. Kınotýyndy 27 aqpannan bastap Qazaqstannyń barlyq kınoteatrlarynda kórsetile bastaıdy. Fılmdegi basty rólderdi Erlan Bilál, Berik Aıtjanov, Áshim Ahmetov pen jas akter Shákárim Almasbek oınady.

Aıta ketý kerek, Aqberen Elgezektiń «Bolmaǵan balalyq shaq» shyǵarmasy qazaq ádebıetine úlken jańalyq bolyp engen týyndylardyń biri. Búginde kitap naǵyz bestsellerge aınalyp, qalyń oqyrmanǵa 40 000 – nan astam danasy taralǵan. Qazaq ádebıetinde kórkem shyǵarmanyń dál osyndaı aýqymdy kórsetkishpen taralýy aıryqsha qubylys. Sonymen qatar bul shyǵarma jeke avtordan álemdik Amazon platformasynda jáne AQSH-taǵy tanymal tarıhı Barnes & Noble ınternet-kitap dúkeninde, AppStore, Playmarket platformalarynda satylyp jatqan tuńǵysh kitap. Jýyrda atalǵan týyndynyń aýdıonusqasy áıgili Audiobooks platformasynda jaryq kórgeli jatyr. Kitaptyń bashqurt tilindegi nusqasy Bashqurtstan Respýblıkasynda jyldyń úzdik prozasy retinde tanyldy. Sonymen qatar shyǵarma qyrǵyz, ózbek tilderine aýdarylýda. Osylaısha shyǵarma kórkem ádebı týyndy retinde keń taralyp, qalyń oqyrmannyń, onyń ishinde orta Azıa kitapsúıerleriniń súıikti kitabyna aınaldy.

Sýret: Aıdyn Sahaman

Shyǵarma Qazaqstannyń úsh birdeı teatrynda sahnalanyp teatr kórermenderiniń de yqylasyna bólengenin de aıta ketken jón. Barlyq teatrlarda shyǵarmanyń ár qoıylymy anshlagpen ótti. Tanymal aqynnyń shynaıy ómirden alynǵan balalyq shaq jaıly shyǵarmasy áýeli kórkem ádebıetke aınalyp, bestsellerler qatarynan kórinse, keıinnen teatr týyndysy retinde óz kórermenin tapty. Al búginde tanymal shyǵarma ekranızasıalanyp, otandyq kıno álemine saparyn bastady. Súıikti shyǵarmalaryn teatrdan kórgen kózi qaraqty kórermen «Bolmaǵan balalyq shaqty» endi el kınoteatrlarynan tamashalamaq.

Derekkózi: Jas Alash saıty